समर्थकलाई ठटाएपछि एभरा समस्यामा
लिस्बन: युरोपेली क्लब फुटबलको दोस्रो ठूलो प्रतियोगिता युरोपा लिगअघि आफ्नै क्लबका एक समर्थकलाई हिर्काएपछि मार्सिल्लेका प्रभावशाली डिफेन्डर प्याट्रिक एभरा समस्यामा परेका छन् । फ्रान्सेली क्लब मार्सिल्लेले बिहीबार राति पोर्चुगिज क्लब भिक्टोरिया डी ग्विमारेजको मैदानमा खेल्ने कार्यक्रम थियो । सोही खेलको अभ्यासका क्रममा ३६ वर्षीय एभराले आफ्नै क्लबका समर्थकलाई ठटाएका थिए ।
मैदानजनिकै बसेर आफ्नो क्लबको अभ्यास हेरिरहेका ती समर्थकको टाउकोमा एभराले ‘एरोबेटिक किक' प्रहार गरेका थिए । समर्थकमाथि जाइलागेका एभरालाई टोलीकै अन्य साथीले छुट्याएका थिए । समर्थकमाथि हातपात गरेपछि एभरालाई भिक्टोरिया डी ग्विमारेजविरुद्घको खेल खेल्नबाट रोक लगाइएको थियो । उनी परिवर्तित खेलाडीको रूपमा टोलीमा सहभागी थिए । उक्त खेलमा मार्सिल्ले १—० गोलले पराजित भएको थियो ।
युरोपेली फुटबल महासंघ (यूईएफए) को अनुशासन समितिले एभरामाथि थप कारबाही गर्ने भएको छ । इङ्लिस प्रिमियर लिग क्लब म्यानचेस्टर युनाइटेडका पूर्वखेलाडी एभरामाथि गरिने थप कारबाहीको निर्णय हुन भने बाँकी छ । मार्सिल्लेका ती समर्थकले अभ्यासमा व्यस्त एभरालाई करिब आधा घन्टादेखि ठूलो स्वरमा जिस्काइरहेको समाचार फ्रान्सेली समाचारपत्रहरूले प्रकाशित गरेका छन् । आफूलाई जिस्काएपछि आक्रोशित बनेका एभराले ती समर्थकको टाउकोमा किक प्रहार गरेका थिए ।
फ्रान्सेली पत्रिका एल इक्विपका अनुसार समर्थकमाथि किक प्रहार गर्नुअघि एभरा र ती समर्थकबीच केही समय विवाद पनि भएको थियो । विवादकै क्रममा आवेशमा आएर एभराले ती समर्थकमाथि किक प्रहार गरेका थिए । ‘प्याट्रिक एभरा टोलीका अनुभवी खेलाडी हुन्, पक्कै पनि त्यहाँ केही भएको हुनुपर्छ, अन्यथा उनले यस्तो कार्य कदापि गर्ने थिएनन्', मार्सिल्लोका प्रशिक्षक रुडी गार्सियाले भनेका छन् ।
करिब आठ वर्ष म्यानचेस्टर युनाइटेडबाट व्यावसायिक फुटबल खेल्दा एभराले क्लबलाई पाँचवटा प्रिमियर लिग र एउटा च्याम्पियन्स लिग उपाधि जिताउन महत्वपूर्ण भूमिका निर्वाह गरेका थिए । सेनेगलका खेलाडी एभरा म्यानचेस्टर युनाइटेडबाट तीन वर्ष इटालियन सिरिए क्लब युभेन्ट्समा बिताएपछि यसै सिजन मार्सिल्लोमा आबद्ध भएका हुन् । गत जनवरीमा मार्सिल्लेमा आबद्ध भए पनि उनले क्लबका लागि हालसम्म दुई खेलमात्र खेलेका छन् ।
एभराको उक्त घटनालाई विभिन्न सञ्चारमाध्यमले मार्सिल्लेकै पूर्वखेलाडी एरिक क्यान्टोनाको घटनासँग तलना गरेका छन् । म्यानचेस्टर युनाइटेडबाट व्यावसायिक फुटबल खेल्दा क्यान्टोनाले सन् १९९५ को जनवरीमा भएको क्रिस्टल प्यालेसविरुद्घको खेलका क्रममा एक समर्थकलाई ‘कुङ् फु किक' प्रहार गरेर ढालेका थिए । उक्त घटनालगत्तै फ्रान्सेली खेलाडी क्यान्टोनालाई रातो कार्ड देखाइएकोे थियो भने उनलाई नौ महिनासम्म कुनै पनि प्रतियोगिता खेल्न नपाउने गरी प्रतिबन्ध पनि लगाइएको थियो ।