काठमाडौं: पुरानो नैकापको शिवम् न्यु डायमन्ड एकेडेमी प्रथम प्याब्सन यू-१८ राष्ट्रिय महिला तथा पुरुष भलिबल प्रतियोगिताको सेमिफाइनलमा प्रवेश गरेको छ । शुक्रबार भएको महिलातर्फको क्वार्टरफाइनल खेलमा चितवनको मेघौली स्पोर्ट्स एन्ड एजुकेसन क्लबलाई ३-० को सोझो सेटमा हराउँदै शिवम् न्यु डायमन्डले सेमिफाइनलमा स्थान बनाएको हो ।
चर्चित राष्ट्रिय खेलाडी स्पाइकर प्रतिभा माली र सेटर कृपा अधिकारीको प्रेरणामा शिवम् न्यु डायमन्डले मेघौली स्पोटर््समाथि २५-११, २५-१६, २५-८ को सहज जित निकाल्यो । खेलमा शिवम् न्यु डायमन्डकी प्रतिभा माली वुमन अफ दि म्याच चुनिइन् ।
बालाजुको नयाँ बसपार्कस्थित ढोरपाटन स्पोर्ट्स ट्रेनिङ सेन्टरमा सञ्चालन भइरहेको महिलातर्फको अन्य खेलमा सफलता हात पार्दै पारा माउन्ट इङ्लिस स्कुल, ढोरपाटन भलिबल क्लब र एभरेस्ट बोर्डिङ स्कुल सेमिफाइनलमा प्रवेश गरेका छन् । शुक्रबार भएको क्वार्टरफाइनल खेलमा काठमाडौंको पारा माउन्ट स्कुलले भक्तपुरको स्प्रिङडेल स्कुललाई २५-२१, २५-१९, २५-१४ को सोझो सेटमा हराउँदै शिवम् न्यु डायमन्डसँग सेमिफाइनलमा भेट पक्का गरेको छ ।
काठमाडौंकै ढोरपाटन स्पोट क्लबले पोखराको टप्स माविमाथि २५-२२, २७-२५, २७-२५ को कठिन जित निकाल्यो । यस्तै रूपन्देहीको एभरेस्ट स्कुलले दाङको श्रीगाउँ खेलकुद विकास समितिलाई २५-२२, २५-१३, २५-२० को सोझो सेटमा हराउँदै सेमिफाइनलमा स्थान बनाउन सफल भयो । महिलाको दोस्रो सेमिफाइनलमा ढोरपाटन र एभरेस्टबीच प्रतिस्पर्धा हुनेछ ।
निजी तथा आवासीय विद्यालय संगठन (प्याब्सन) को मुख्य प्रायोजनमा सञ्चालन भएको पुरुषतर्फको क्वार्टरफाइनल खेलमा सफलता हात पार्दै कञ्चनपुरको लिटिलबुद्ध एकेडेमी र काठमाडौंको सेक्रेट हार्ट स्कुल सेमिफाइनलमा प्रवेश गरेका छन् । काठमाडौंको सेक्रेट हार्टले बूढानीलकण्ठको थ्रीस्टार एकेडेमीलाई २५-१८, २५-२३, २५-२३ को सोझो सेटमा हराउँदा लिटिलबुद्ध एकेडेमीले भक्तपुरको स्प्रिङडेल एकेडेमीलाई २५-२१, २५-२३, २५-१७ को नतिजा आफ्नो पक्षमा पार्यो ।
पुरुषतर्फ न्युटन स्कुल र ढोरपाटन भलिबल क्लबवीचको तेस्रो क्वार्टरफाइनल खेल खराब प्रकाशका कारण स्थगित भयो । उक्त खेल शनिबार हुने आयोजकले जनाएको छ । पुरुषतर्फको सेमिफाइनलमा सेक्रेट हार्ट स्कुलले नुवाकोटको बुङताङ भलिबल टिमसँग खेल्नेछ भने लिटिलबुद्धले न्युटन र ढोरपाटनबीचको विजेतासँग प्रतिस्पर्धा गर्नेछ।
नेपाल विद्यालय भलिबल कमिसनको आयोजना सञ्चालन भएको प्रतियोगिताको महिला र पुरुष दुवैको विजेता टोलीले नगद एक लाख प्राप्त गर्नेछन् । यस्तै उपविजेताले ६० हजार, तेस्रो हुने टोलीले ३५ हजार तथा उत्कृष्ट विधाका विजेताले नगद पाँच हजारसहित उत्कृष्ट अवार्ड हात पार्नेछन् ।
प्रतिक्रिया दिनुहोस !
