नेपाल दोस्रो अभ्यास खेलमा पनि पराजित
काठमाडौं : नेपाली यू-१९ राष्ट्रिय क्रिकेट टोली बंगलादेशविरुद्धको दोस्रो अभ्यास खेलमा पनि पराजित भएको छ । शनिबार भएको खेलमा नेपाल घरेलु टोली बंगलादेशसँग एक सय २३ रनको भारी अन्तरले पराजित भएको हो । नेपाल बिहीबार भएको बंगलादेशविरुद्धको पहिलो अभ्यास खेलमा पनि तीन विकेटले पराजित भएको थियो ।
साभारस्थित बंगलादेश क्रिरा सिखा प्रोटिस्तानको मैदानमा टस जितेको नेपालले घरेलु टोलीलाई पहिले ब्याटिङमा निम्त्याएको थियो । यसमा बंगलादेशले निर्धाररित ५० ओभर पूरै ब्याटिङ गर्दै आठ विकेटको क्षतिमा दुई सय २७ रनको योगफल तय गरेको थियो । जवाफी ब्याटिङमा आएको नेपाल ३६.५ ओभरमा एक सय चार रनमै सीमित भएपछि भारी अन्तरको पराजय बेहोर्न पुग्यो ।
पहिलो खेलमा जस्तै दोस्रो खेलमा पनि नेपालको ब्याटिङ चलेन । नेपालका लागि नवौं क्रमका रसिद खानले २४ रन जोड्नेबाहेक अन्य खेलाडीले त्योभन्दा ठूलो योगदान गर्न सकेनन् । ५० बल खेलेका उनले एक छक्का र दुई चौका प्रहार गरेका थिए । पवन सर्राफले १६ रन जोड्दा सन्दीप लामिछानेले अविजित १३ रन जोडे । आठौं क्रममा क्रिजमा आएका प्रनीत थापामगरले १२ रन जोड्दा अन्य सात नेपाली खेलाडीले दोहोरो संख्यामा रन जोड्न सकेनन् । त्यसमध्ये कप्तान दीपेन्द्रसिंह ऐरी र सहब आलम शून्य रनमै आउट भए ।
सुरुआती ब्याट्सम्यान मोहम्मद आसिफ सेखले नौ रन तथा सन्दीप सुनार तीन रनमै आउट हुँदा तेस्रो क्रमका ब्याट्सम्यान अनिलकुमार शाह पनि तीन रनमै आउट भए । चोथो क्रममा आएका कप्तान दीपेन्द्रसिंह ऐरी बिनाकुनै रन पभेलियनतर्फ फर्कंदा रोहितकुमार पौडेलले नौ र भीम सार्कीले चार रन जोडेका थिए । त्यसअघि सन्दीप लामिछाने र कप्तान दीपेन्द्रले दुईदुई विकेट लिएका थिए । नेपालले लिएको आठ विकेटमध्ये चार रन आउटमार्फत लिएको थियो ।
बंगलादेशका लागि तेस्रो क्रमका ब्याट्सम्यान सइफ हसनले ६२ रन तथा अफिफ हुसेनले ५९ रनको योगदान गर्दा बंगलादेशले ठूलो योगफल जोडेको थियो । सइफलाई सन्दीपले भिक सार्कीमार्फत क्याच आउट गराएका थिए भने अफिफलाई रसिद खानले रन आउट गराएका थिए ।
अर्काे साताबाट मलेसियामा आयोजना हुन लागेको एसियाली क्रिकेट काउन्सिल (एसीसी) यू-१९ युथ एसिया कप क्रिकेटको तयारीस्वरूप नेपाल अभ्यास खेलका लागि बंगलादेश पुगेको हो । नेपालले आइतबार बंगलादेशविरुद्ध तेस्रो तथा अन्तिम अभ्यास खेल खेल्नेछ । अन्तिम अभ्यास खेलसँगै नेपाल फर्किएपछि नेपाली टोली प्रतियोगिताका लागि मलेसियातर्फ प्रस्थान गर्नेछ ।
नेपाल युथ एसिया कपमा पनि बंगलादेश रहेकै समूह ‘ए’मा परेको छ । नेपालको समूहमा टेस्ट मान्यता पाएको भारत र आयोजक मलेसियाको युवा टोली पनि छ । प्रतियोगितामा नेपाललाई समूह चरण पार गर्नका लागि बंगलादेशविरुद्धको जारी अभ्यास खेलको प्रदर्शनमा सुधार ल्याउन आवश्यक छ ।