अल्ट्राधाविका मीराको सम्मानमा दौड
भोजपुर : भोजपुरको पूर्वी क्षेत्र पौवादुङ्मा गाउँपालिका-५ सानोदुम्मामा जन्मेर आफ्नो जन्मभूमिलाई विश्वमा चिनाउने नेपाली अल्ट्रा धाविका मीरा राईको सम्मानमा भोजपुर ट्रायल रेस प्रतियोगिता हुने भएको छ । नेपाल ट्रायल रेस, रिमाचुङ एजुकेसन स्पोर्टस् एकेडेमी र सानोदुम्मा माविको संयुक्त आयोजनामा यही मंसिर २ गते सुरु हुने प्रतियोगितामा जिल्लाका महिला तथा पुरुष धावक सहभागी हुनेछन् ।
अल्ट्राधाविका मीरा राईको जन्मगाउँ सानोदुम्मामा आगामी मंसिर २ गते सम्पन्न हुने उक्त दौड थर्पु स्कुलबाट मानेडाँडा, बास्तिम, पारपानी हुँदै भोजपुर टँडिखेलसम्मको १७ किलोमिटर लामो दूरीमा पुगेर टुंगिनेछ ।
दौडमा प्रथम हुने पुरुष तथा महिलातर्फका विजेताले १० हजार, मेडल र प्रमाणपत्र प्राप्त गर्नेछन् । यस्तै दोस्रो, तेस्रो, चौथो र पाँचौं हुने धावकले क्रमशः आठ हजार, ६ हजार, चार हजार र दुई हजार नगदसहित मेडल, प्रमाणपत्र प्राप्त गर्नेछन् । यस्तै महिला र पुरुष दुवैतर्फ सिनियर र जुनियर चारजनालाई तीन हजारका दरले नगद, प्रमाणपत्र र मेडल प्रदान गरिने आयोजकले जनाएको छ ।
दौडमा जिल्लाभित्र तथा बाहिरका खेलाडीले सहभागी हुन पाउने भएकाले धरान रन र भोजपुर रनबाट आवेदन भर्न सकिने आयोजकका संग्राम राईले बताए । महिलातर्फ पहिलो हुनेले आगामी जनवरीमा हङकङमा हुने रेसमा सहभागी हुन पाउने अवसर पाउनेछन् । मीराले यसअघि त्यहाँ आयोजना भएका थुप्रै रेसमा प्र्रथम भएकी थिइन् ।
वर्षैपिच्छे आयोजना गरिने यो ट्रायल रेसलाई थप विस्तार गर्न अन्तर्राष्ट्रिय स्तरको प्रतियोगिता गर्न मिल्ने खालका उपयुक्त रुटको खोजी भइरहेको एकेडेमीका अध्यक्ष पाविहाङ राईले बताए । ‘गाउँमा रेसका लागि शारीरिक रूपमा उपयुक्त हुने, रुचि राख्ने थुप्रै प्रतिभा छन् । उनीहरूले राम्रो अवसर पाएका छैनन् । लुकेका ती प्रतिभालाई बाहिर ल्याउन र मीराजस्तै व्यक्तित्व जन्माउन लागिपरेका छौं’, उनले भने । प्रतियोगितामा मीरा राईको प्रत्यक्ष उपस्थिति रहने आयोजकको जानकारी छ ।
प्रतिक्रिया दिनुहोस !
