लोकतान्त्रिक गठबन्धन नबन्दा कांग्रेसलाई घाटा
तौलिहवा : दोश्रो चरण अन्र्तगत मंसिर २१ गते हुन गइरहेको प्रतिनिधि तथा प्रदेश सभा निर्वाचनमा दलहरु चुनावी मैदानमा होमिएका छन् । देशभर बामपन्थी दलहरु संयुक्तरुपमा चुनावी मैदानमा उत्रिएका छन् भने कतिपय स्थानमा लोकतान्त्रिक गठबन्धन चुनावी मैदानमा उत्रिएको छ । तर कपिलवस्तुमा भने बामपन्थी दलसँग कांग्रेस एकल प्रतिस्पर्धा गर्ने भएको छ ।
जिल्लाका प्रतिनिधिसभाका तीन र प्रदेशसभाका छ तहमा वामगठबन्धनसँग नेपाली कांग्रेस एकल प्रतिष्पर्धामा उत्रेको छ । जिल्लामा मधेशवादी दल, नयाँ शक्ति र राप्रपासँग संयुक्त रुपमा लोकतान्त्रिक गठबन्धन बनाउने प्रयास असफल भएपछि यस्तो अवस्था आएको हो । अहिले बामगठबन्धनसँग एक्लै प्रतिष्पर्धा गर्नुपर्दा कपिलवस्तुसका ३ वटै क्षेत्र कांग्रेसका लागि चुनौती पूर्ण देखिएका छन् र्। कांग्रेसका लागि अस्तित्व जोगाउने सकस सुरु भएकोछ । क्षेत्र नं १ र २ मा वाम गठबन्धन फराकिलो अन्तरका साथ अगाडी रहेकोछ । क्षेत्र नं ३ मा भने हालै फोरम परित्याग गरि कांग्रेस पसेका अभिषेक शाहका कारण पनि चुनावी टक्कर बढ्ने देखिन्छ ।
भर्खरै सम्पन्न स्थानीय तहको निर्वाचनमा राजनितिक दलहरुले पाएको मतका आधारमा पनि कांग्रेस र एमाले माओवादी गठबन्धन सहितको बाम मोर्चाबीचको चुनाव रोचक बन्ने देखिएको छ । राजपा र फोरमका ठूला नेता कांग्रेस एमाले पसेपछि विगतमा कपिलवस्तु कब्जा गरेको मधेशवादी दलको अवस्था अहिले निकै खस्किएको छ । भर्खरै सम्पन्न १० वटा स्थानीय तहमा पाएको मतका आधारमा पनि दलहरुको आगामी प्रतिस्प्रधाको आकलन गर्न सकिन्छ ।
प्रतिनिधि सभा १ : प्रतिनिधि सभा क्षेत्र नं. १ मा बाणगंगा नगरपालिका, शुद्धोधन गाउँपालिका, मायादेवी गाउँपालिका र कपिलवस्तु नगरपालिकाका ३ वडा जोडिएका छन् । स्थानीय तह निर्वाचनमा ती क्षेत्रका प्रमुख पदका उम्मेद्धवारलाई खसेको मतको आधारमा लोकतान्त्रिक दलहरुको मत २७ हजार १ सय २८ मत हुन जान्छ । कांग्रेस, राप्रपा, फोरम लोकतान्त्रिक र नयाँ शक्तिको उम्मेद्धवारले उक्त मत पाएका छन् । बाम गठबन्धनको २६ हजार ७ सय १ मत रहेकोछ । तर संघीय फोरम र नयाँ शक्ति सहितका दल छुट्टाछुटटै लडेकाले कांग्रेसको मात्र मत करिब ४ हजारले घट्न जान्छ । जस अनुसार ४÷५ हजार मतले स्वत ः बाम गठबन्धन अगाडी रहेको स्थानीय तहको परिणामबाट प्रष्ट हुन्छ । अर्को तर्फ राजपा छाडेका वृजेश कुमार गुप्ताको समूहको मत समेत बाम गठबन्धनमा आएका कारण यस पटकको निर्वाचनमा बाम गठबन्धन बलियो देखिएको हो । बाणगंगा नगरपालिकामा लोकतान्त्रिक दलहरुले १६ हजार १ सय १, बाम गठबन्धनले १९ हजार ६ सय ८२ मत पाएका छन् । शुद्धोधन गाउँपालिकामा लोकतान्त्रिक दलहरुले ४ हजार ६ सय ७२ र बाम गठबन्धनले ३ हजार ४ सय ३७ मत पाएका थिए । मायादेवी गाउँपालिकामा लोकतान्त्रिक दलहरुले ६ हजार ३ सय ५५ र बाम गठबन्धनले ३ हजार ५ सय ८२ मत स्थानीय तह निर्वाचनमा पाएका थिए । यो सबैमा लोकतान्त्रिक गठबन्धन नबनेकाले करिव ५ हजार मतले बाम गठबन्धन अघि देखिन्छ । तसर्थ बाम गठबन्धन र कांग्रेस एकल चुनाव लड्दा ७ देखि माथिको फराकिलो अन्तरमा बाम गठबन्धनका उम्मेदवार विजयी हुने देखिएकोछ ।
प्रतिनिधि सभा २ ः
बुद्धभूमी नगरपालिका, कपिलवस्तु नगरपालिका, महाराजगञ्ज नगरपालिकाको अधिकांश भाग तथा यशोधरा गाउँपालिका प्रतिनिधि सभा क्षेत्र नं. २ मा पर्दछन् । राजपा त्यागेर एमाले सहित बाम घटकबाट उम्मेद्धवार बनेका वृजेश कुमार गुप्ता तथा कांग्रेस सभापति सुरेन्द्रराज आचार्यबीच टक्कर हुने देखिन्छ । स्थानीय तह निर्वाचनमा पाएको मतका आधारमा पनि दुबै मोर्चाबीच प्रतिस्प्रधा देखिएको छ । हालै सम्पन्न स्थानीय तह निर्वाचनमा लोकतान्त्रिक दलहरुले ३४ हजार ९ सय २३ मत पाएका छन् भने बाम गठबन्धन तथा वृजेश कुमार गुप्ता निकट प्रमुख उम्मेद्धवारले ३४ हजार ८ सय ५२ मत प्राप्त गरेका छन् ।
जसमा ७१ मतको मात्र अन्तर देखिएको छ । तर सो क्षेत्रमा पनि राजपा, फोरम र नयाँ शक्तिको अलग अलग उम्मेदवारीका कारण कांग्रेससँग करिव २८ हजार मत मात्र रहेको मान्न सकिन्छ । लोकतान्त्रिक दलहरुले कपिलवस्तु नगरपालिकामा ९ हजार २ सय ५४ र बाम गठबन्धनले ८ हजार ९ सय ४९ मत पाएका थिए । बुद्धभूमी नगरपालिकामा बाम गठबन्धनले ११ हजार ६ सय ४१ र लोकतान्त्रिक दलले ११ हजार ४ सय ६२ मत पाएका छन् ।
महाराजगंजमा बाम गठबन्धनले ८ हजार ८ सय ४८ र लोकतान्त्रिक दलहरुले ८ हजार ७ सय २ मत प्राप्त गरेका थिए । यशोधरामा लोकतान्त्रिक दलहरुले ५ हजार ४ सय ७८ र बाम गठबन्धनले ५ हजार ४ सय १४ मत पाएको थियो । यी सबैमा पनि लोकतान्त्रिक दलहरुको गठबन्धन नबन्दा काँग्रेस उम्मेदवार बाम गठबन्धन भन्दा करिब ५ हजार मतले पछि पर्ने स्वत विष्लेषण गर्न सकिन्छ ।
प्रतिनिधि सभा ३
लगातार फोरमबाट २ पटक सम्म सभासद बनेर हालै कांग्रेस प्रवेश गरेका अभिषेक शाहको पकड क्षेत्रका स्थानीय तहमा एमाले र स्वन्त्रत सहित माओवादीले जितेपछि यतिखेर यस क्षेत्रमा पनि कडा टक्कर देखिएको छ । मधेस आन्दोलनका एक हस्ती इश्वर दयाल मिश्र बामपन्थी समूहबाट उम्मेद्धवार बनेपछि यहाँ पनि प्रतिस्प्रधा निकै रोचक हुने देखिन्छ । स्थानीय तह निर्वाचनमा बाम गठबन्धनले ३ नम्बर क्षेत्रबाट १५ हजार ७ सय ५५ मत पाएका थिए भने लोकतान्त्रिक दलहरुले १२ हजार ६ सय २१ मत पाएको थिए ।
तर माओवादी र कांग्रेस सहित शाह परिवारबाट समेत बागी उम्मेद्धवार भई अत्याधिक मत बाडिएको कारण यहाँ यसै केही भन्न सक्ने अवस्था नरहेको राजनितिक विश्लेषकहरु बताउँछन् । विजयनगर गाउँपालिकामा बाम गठबन्धनले ३ हजार ९ सय ६३ र लोकतान्त्रिक दलहरुले १२०५ मत पाएका छन् । शिवराज नगरपालिकामा बाम गठबन्धनले ७ हजार ८ सय ७६ र लोकतान्त्रिक दलहरुले ६ हजार ५६ मत पाएका छन् । कृष्णनगरमा लोकतान्त्रिक दलको ५ हजार ३ सय ६० र बाम समूहमा ३ हजार ९ सय १७ मत खसेको थियो । यहाँ प्रतिस्पर्धा देखा परेकाले बाम गठबन्धनले यति नै अन्तरमा जित्न सक्छ भन्ने आकलन गर्न कठिन छ । सतहमा हेर्दा कांग्रेस भन्दा वाम गठबन्धन बलियो देखा परेकोछ ।
यता स्थानीय तह निर्वाचनपछि जिल्ला निर्वाचन कार्यालयले गरेको नयाँ मतदाता संकलन अभियानमा २५ हजार २ सय १४ जना नयाँ मतदाता थपिएका छन् । सबै भन्दा बढी प्रतिनिधि सभा १ को (१) अन्र्तगत नयाँ मतदाता थपिएका छन् । निर्वाचन कार्यालय श्रोतका अनुसार करिब ९ हजार ५ सय मतदाता त्यहिका छन् । स्थानीय तह निर्वाचनमा बाणगंगा नगर प्रमुखमा जम्मा ५ सय मतका झिनो अन्तरले पराजित नतिजा अहिले थपिएका नयाँ मतदाताले धेरै उथलपुथल गर्न सक्नेछन् । नयाँ मतदाता दर्ताका लागि एमाले, कांग्रेस र माओवादीले आफु निकटकालाई ह्वीप नै जारी गरी दर्ता गराउन पठाएका थिए । बाणगंगा नगरपालिका, कपिलवस्तु नगरपालिका र शिवराज नगरपालिकामा बढि थपिएका मतदाताले पनि आगामी निर्वाचनको परिमाणलाई अर्कै मोड दिने हैसियत राख्ने राजनितिक विश्लेषक हरीराज शर्मा बताउँछन् ।