धमाधम भित्रिन थाले केरुङवाट निर्वाचन सामग्री

नुवाकोट : आगामी मंसिर १० र २१ गते हुने प्रदेश तथा संघीय निर्वाचनका लागि नेपालको उत्तरी छिमेकी देश चीनबाट रसुवागढी नाका हुदै धमाधम निर्वाचन सामग्री आइरहेको छ । नेपाल–चीनबीच हाल सञ्चालनमा रहेको एकमात्र रसुवागढी नाकावाट दुई पटक गरेर पाँच कन्टेनरमा निर्वाचन सामग्री नेपाल भित्रिएका छन् ।

 

काठमाडौबाट एकसय ५२ किलोमिटर दुरीमा उत्तर भोटेकोशी नदी किनारमा रहेको रसुवागढी नाकाबाट मतपेटिका बाहेकका निर्वाचन सामग्री आउने क्रम सुरु भएको रसुवाका प्रमुख जिल्ला अधिकारी हिरादेवी पौडेलले जानकारी दिइन् । समेमबारसम्म निर्वाचन सामग्री बोकेका पाँच थान कन्टेनरलाई रसुवागढी नाकावाट प्रवेश गराई नुवाकोटको विदुर हुदैँ काठमाडौ पठाइएको छ ।

रसुवा प्रशासनका अनुसार आगामी मंसिर १० र २१ दुई चरणमा गरिने तय भएको निर्वाचनका लागि केरुङबाट पहिलो चरणमा दुई वटा र दोश्रो चरणमा तीन कन्टेनरमा विभिन्न प्रकारका निर्वाचन सामग्री बोकेका कन्टेनर आयात भएको आयातकर्ता ग्लोवल लजिविटक सप्लायर्सका प्रदीप बस्नेतले जानकारी दिए । उनका अनुसार पाँच थान कन्टेनरमा चीनको ग्वान्झाओ सिगात्सेबाट केरुङ हुँदै रसुवागढी नाकावाट निर्वाचनका लागि छेकाबार ३० हजार, सिल तीन लाख, मार्कर ७७ हजार थान, रवर म्याट २५ हजार थान र इक तथा इंक प्याड ६० हजार थान नेपाल भित्रिसकेका छन् ।

नजिक र सस्तो रहेका कारण चीनवाट निर्वाचन सामग्री खरिद गरिएको जनाइएको छ । निर्वाचनका लागि चीनवाट आगामी मंसिर १० र २१ गतेका लागि सुरक्षा सिल आठ लाख थान, छेकावार ६० हजार थान, मार्कर ७७ हजार थान, मसि र मसि प्याड गरि एक करोड ४६ हजार थान आउने क्रममा रहेको आयातकर्ता ग्लोवल लजिविटक सप्लायर्सका प्रदीप वस्नेतले जानकारी दिए । पाँच थान कन्टेनरमा पहिलो र दोश्रो चरणमा सामान आइसकेको र अब १० थान कन्टेनरमा अबको एक सातामा सबै सामान काठमाडौ पुगिसक्ने बस्नेतले बताए ।

चीनबाट आयात गरिएका निर्वाचन सामग्रीहरुमा मतपेटिका र मतपत्रबाहेक निर्वाचनलाई आवश्यक पर्ने सिल, छेकावार, रवर म्याटलगायतका सामग्री रहेको रसुवा प्रहरी प्रमुख प्रहरी नायव उपरीक्षक शरतकुमार थापाक्षेत्रीले जानकारी दिए । उनका अनुसार निर्वाचनका लागि आवश्यक सामग्री तेश्रो चरणमा केरुङबाट नेपाल ल्याउन सुरु भएको र ६ वटा कन्टेनर केरुङ गएका छन् ।

निर्वाचन सामग्री बोक्न बाँकी कन्टेनरहरु चीन प्रवेश गरिरहेका छन् । निर्वाचन सामग्री ल्याउनका लागि १० ओटा कन्टेनर प्रयोग गरिने र सामग्री नअटेमा अन्य कन्टेनरको पनि प्रयोग गरिने जनाइएको छ ।

रसुवागढी नाका हुँदै ल्याइएको उक्त सामग्री नेपाल प्रहरी र सशस्त्र प्रहरीको स्कर्टिङमा निर्वाचन आयोग लगिएको हो । यस पटकको निर्वाचन सामग्री ग्लोबल लजिष्टिक सप्लायर्स कम्पनीले आयात गरेको हो ।

दुवै चरणको निर्वाचनलाई पुग्ने गरी निर्वाचन आयोगले चीनबाट सामान खरिद गरेको हो । गत स्थानीय निर्वाचनमा चीनबाट केरुङ हुदै रसुवागढी नाकावाट २६ हजार ६ सय थान मतपेटिका, आठ लाख थान सिल खरिद गरि आयात गरिएको थियो ।