वामको किल्लामा कांग्रेसका ‘हेभीवेट’
सिरहा : जिल्लाको क्षेत्र नं. १ मा वामगठबन्धन र कांग्रेसबीचको चुनावी प्रतिष्पर्धा रोचक हुने भएको छ ।स्थानीय तह निर्वाचनको परिणामलाई आधार मान्दा यो क्षेत्रमा वामगठबन्धन बलियो छ तर कांग्रेसको ‘हेभीवेट’ उम्मेदवारका कारण प्रतिष्पर्धा रोचक हुने भएको हो । कांग्रेसबाट नेता प्रदीप गिरीले प्रतिनिधिसभा सदस्यको लागि उम्मेदवारी दिएका छन् । विगतमा उनले क्षेत्र नं ४ बाट उम्मेदवारी दिने गरेका थिए । यसपटक गिरीले जन्मथलो रोजेका छन् ।
वामगठवन्धनबाट एमालेका केन्द्रीय सदस्य गंगाप्रसाद यादवको उम्मेदवारी परेको छ । राप्रपाका केन्द्रीय सदस्य तथा स्थानीय स्तरमा अत्यन्त लोकप्रिय लगनलाल चौधरी पनि एमालेमा प्रवेशपछि वामगठबन्धनलाई झन फाइदा पुगेको छ । मधेस आन्दोलनको उद्गमस्थल मानिने यस क्षेत्रमा संघीय समाजवादी फोरमबाट पूर्वविना विभागिय मन्त्री राजलाल यादवको उम्मेदवारी परेको छ ।
गिरीले राजपाका नेता राजकिशोर यादवका लागि क्षेत्र परिवर्तन गरेको प्रतिक्रिया दिए । यस क्षेत्रमा पर्ने लहान नगरपालिका र सखुवा ननकारकट्टी गाउँपालिकामा स्थानीय तहको निर्वाचन क्षेत्रमा एमालेले जितेको थियो भने भगवानपुर गाउँपालिकामा फोरमले जितेको थियो । दुई गाउँपालिका र एक नगरपालिकामा एमाले र माओवादी केन्द्रले प्राप्त गरेको मत विश्लेषण गर्दा कांग्रेसभन्दा वामगठन्धनको मत दोब्बरको हाराहारीमा पुग्छ । राप्रपाका चौधरीको एमाले प्रवेशले वामगठबन्धको मत बढेको विश्लेषकहरु बताउँछन् ।
कांग्रेसले उम्मेदवारी फिर्ताको अन्तिम क्षणसम्म पनि संघीय समाजवादी फोरम र राजपासंग तालमेल गर्ने भरमग्दुर प्रयत्न गरेको थियो । सिरहाको क्षेत्र नं. १ गिरीको लागि छाडिदिए कांग्रेसले सिरहाको बाँकी ३ क्षेत्रबाट उम्मेदवारी फिर्ता लिई संघीय समाजवादी फोरम र राजपालाई सघाउन पनि पनि तयार भएका थिए।
कांग्रेसका उम्मेदवारहरु उम्मेदवारी फिर्ता लिन निर्वाचन कार्यालयसम्म पुगे तर संघीय समाजवादी फोरमवाट उम्मेदवारी दिएका राजलाल यादवले उम्मेदवारी फिर्ता लिन मानेनन् । फिर्ताको पहलका लागि घर पुगेका केन्द्रीय अध्यक्ष उपेन्द्र यादव पनि पनि राजलालले टेरेनन्। पत्रकार अर्जुन थपलिया यो क्षेत्रमा कांग्रेस वामशक्तिबाट तर्सिएको र वामगठबन्धन प्रदीप गिरीको क्षमता र ओजबाट झस्किएको टिप्पणी गर्छन् ।
प्रतिक्रिया दिनुहोस !
