महाकालीपारि पहिलो पटक उम्मेदवार
महेन्द्रनगर : कञ्चनपुरमा महाकालीपारिको मत हरेक निर्वाचनमा निर्णायक देखिँदै आएको छ । तर, यहाँका मतदाताले भने आफ्नो क्षेत्रका उम्मेदवार पाउन सकेका थिएनन् । मंसिर २१ गते हुन लागेको प्रतिनिधिसभा र प्रदेशसभा निर्वाचनमा भने उनीहरूले प्रदेशसभाका लागि दुई जना उम्मेदवार पाएका छन् ।
क्षेत्र नम्बर ३ (२) बाट प्रदेशसभातर्फ वाम गठबन्धन र कांग्रेसबाट उम्मेदवारी दिएका दुवै जना महाकालीपारिका हुन् । त्यसमा पनि उनीहरू एकै वडा महाकाली नगरपालिका-७ मा बसोबास गर्छन् । वाम गठबन्धनबाट माओवादी केन्द्रका मानबहादुर सुनार र कांग्रेसबाट बेलबहादुर राना चुनावी मैदानमा छन् ।
दुई उम्मेदवार आफ्नै क्षेत्रबाट पाउँदा मतदाता कसलाई भोट दिने भन्ने अन्योलमा छन् । ‘पहिलो पटक एकै वडाका दुई जनाले उम्मेदवारी दिन पाएका छन्’, स्थानीय गोपी कँडेलले भने, ‘दुवै नेता पूर्वजनप्रतिनिधि भएर कामसमेत गरिसकेका हुन् ।’
दुवै उम्मेदवार एकै वडाका र जनतामाझ भिजेका व्यक्ति भएकाले उनीहरूबीच कडा प्रतिस्पर्धा हुने स्थानीयको आकलन छ ।
दुवै उम्मेदवारका चुनावी एजेन्डा हेरेर सक्षमलाई भोट दिने पक्षमा मतदाता देखिएका छन् । साविकको दोधारा-चाँदनी क्षेत्रले दुई उम्मेदवार पाउनु खुसीको कुरा भएको स्थानीयले बताएका छन् । वाम गठबन्धनका उम्मेदवार सुनारले आफूले गाविस अध्यक्ष हुँदा गरेको विकास जनताले देखेको उल्लेख गर्दै यसपटक मत दिएर जिताउनेमा विश्वस्त रहेको बताए । ‘मैले गाविस अध्यक्ष हुँदा गरेको विकास सबैले देखेकै छन्’, उनले भने, ‘अहिले पनि महाकाली नगरपालिकालाई समृद्ध बनाउने अभियानसहित जनतामाझ आएको छुँ ।’
दोधारा-चाँदनीमा निर्माण गरिने सुख्खा बन्दरगाह, महाकाली नगरपालिकालाई सदरमुकामसम्म जोड्ने सडकका साथै शिक्षा, स्वास्थ्य र बेरोजगारी समस्याको अन्त्यलगायत समृद्ध महाकाली नगरपालिका बनाउने आफ्नो चुनावी एजेन्डा रहेको उनले बताए । महाकालीमा निर्माणाधीन पुलको कार्यान्वयनसहित महाकाली नगरपालिकालाई समृद्ध बनाउन आफ्नो उम्मेदवारी भएको उनको दाबी छ।
उनी २०४९ सालमा दोधारा गाविस अध्यक्षमा निर्वाचित भएका थिए । कांग्रेसबाट निर्वाचन जितेका उनी २०५१ सालको निर्वाचनमा कांग्रेस उम्मेदवार एनपी साउदविरुद्ध बागी उठेर तीन सय मतले पराजित भएका थिए ।
कांग्रेस उम्मेदवार राना २०४९ सालमा जिल्ला विकास समिति सदस्य र २०५४ मा दोधारा गाविस अध्यक्षमा निर्वाचित भएका थिए । उनले पनि जनप्रतिनिधि हुँदा आफूले गरेको विकास र पछिल्लो समय कांग्रेसले थालेको विकास अभियानमा सबै जनताले साथ दिने विश्वास व्यक्त गरे । ‘म र मेरो पार्टीले यस क्षेत्रमा गरेको विकास सबै जनताले देखेकै छन्’, उनले भने, ‘ त्यही विश्वासले पनि अझ यस क्षेत्रको समृद्धिका लागि भोट दिएर जिताउनेछन्।’
उनले पनि दोधारा-चाँदनीमा निर्माण हुने सुख्खा बन्दरगाह, महाकालीमा पक्की पुल निर्माण, बाढी नियन्त्रणसहित शिक्षा, स्वास्थ्य, सबैलाई रोजगारी नै आफ्नो चुनावी एजेन्डा बनाएका छन् । उनले वाम गठबन्धन भए पनि कांग्रेसलाई निर्वाचन जित्न असहज नहुने दाबीसमेत गरे । उनलाई राप्रपाको सहयोग मिलेको छ ।
दुवै उम्मेदवार एकै वडाका र जनतामाझ भिजेका व्यक्ति भएकाले उनीहरूबीच कडा प्रतिस्पर्धा हुने स्थानीयको आकलन छ । प्रदेशसभातर्फ (२) मा भीमदत्त नगरपालिकाका केही वडासमेत पर्दछन् । भीमदत्तका ११, १२, १३, १४, १५, १६ र १८ नम्बर वडा क्षेत्र नम्बर ३ (२)मा पर्छन् । प्रदेशसभाको यो क्षेत्रमा ४४ हजार आठ सय ६८ मतदाता छन् । महाकाली नगरपालिकामा २२ हजार तीन सय १५ र भीमदत्तका सात वडामा २२ हजार पाँच सय ५३ मतदाता छन् ।
प्रतिक्रिया दिनुहोस !
