बागी फकाएर घरदैलोमा
विराटनगर : बागी व्यवस्थापनसँगै मोरङका ठूला दल निर्वाचन प्रचारमा लागेका छन् । बागी उम्मेदवारी फिर्ता लिएकाहरूले पनि पार्टीका उम्मेदवारलाई सघाउने प्रतिबद्धता जनाएका छन् ।कांग्रेसबाट प्रतिनिधिसभातर्फ उम्मेदवार बनेका ६ मध्ये चार जनाले सोमबार प्रेस युनियन मोरङले गरेको अन्तरसंवाद कार्यक्रमबाट एजेन्डा प्रस्तुत गर्दै निर्वाचन प्रचारमा होमिएको घोषणा गरे ।
निर्वाचन क्षेत्र नम्बर ४ का कांग्रेस उम्मेदवार महेश आचार्यले लोकतन्त्रको थप संरक्षण, दलहरूबीच एकता र आर्थिक विकासजस्ता राष्ट्रिय सन्दर्भलाई लिएर आफू निर्वाचनमा होमिएको बताए । उनले विराटनगरलाई प्रादेशिक राजधानीका रूपमा विकास गर्ने, केसलिया, सिंघिया, जुँडीलगायत नदी नियन्त्रणको योजना, विराटनगरमा अन्तर्राष्ट्रिय रंगशाला र क्षेत्रीय विमानस्थलको विकास पहिलो प्राथमिकता रहेको सुनाए ।
क्षेत्र नम्बर १ का उम्मेदवार डिगबहादुर लिम्बू, २ का डा. मीनेन्द्र रिजाल, ३ का डा. सुनील शर्मा र ४ का आचार्यले एकसाथ चुनावी एजेन्डा प्रस्तुत गरे । कार्यक्रममा क्षेत्र नम्बर ५ का अमृत अर्याल र ६ का डा. शेखर कोइराला भने अनुपस्थित थिए ।
एमाले मोरङका अध्यक्ष विनोद ढकालका अनुसार वाम गठबन्धन पनि चुनावी अभियानमा लागेको छ । माओवादी केन्द्र र एमाले उम्मेदवार संयुक्त रूपमा मतदाताको घरदैलोमा पुग्न थालेका छन् । ‘कतिपय ठाउँमा प्रचार कमिटी गठन गर्ने र स्थानीय निर्वाचन परिचालन कमिटी बनाउने काम भइरहेको छ’, उनले भने, ‘स्थानीय तह निर्वाचनमा एमाले र माओवादी केन्द्रले प्राप्त गरेको जनमतलाई बचाउँदै हामी विजयी हुने रणनीतिमा छौं ।’ उनले बहुमत ल्याउने केन्द्रीय तयारीअनुसार नै जिल्लामा चुनावी अभियान अघि बढाएको सुनाए ।
मोरङमा ‘हेभिवेट’ उम्मेदवार आमनेसामने भएका छन् । क्षेत्र नम्बर ६ मा एमालेका लालबाबु पण्डित र कांग्रेसका डा. शेखर कोइरालाबीच हुने प्रतिस्पर्धालाई चासोका हेरिएको छ । सोमबार मात्र पण्डितले मतदाता रिझाउने योजनाका विषयमा कार्यकर्ता, भ्रातृसंगठन र शुभेच्छुकसँग छलफल गरे । उनले कार्यक्रममा भने, ‘एमालेले विगतमा प्राप्त गरेको जनसमर्थनलाई कायम राख्दै विजय सुनिश्चित बनाउनुपरेको छ ।’ उनले एमालेका चुनावी एजेन्डालाई जनतासम्म लैजान र कांग्रेसले विगतमा प्राप्त गरेको जनसमर्थनका बाबजुद विकास गर्न नसकेको क्षेत्रमा ध्यान केन्द्रित गर्ने बताए ।
एमालेले मोरङमा प्रतिनिधिसभातर्फ क्षेत्र नम्बर ४ मा माओवादी केन्द्रका अमनलाल मोदी र ५ मा शिवकुमार मण्डललाई छाडिदिएको छ । कांग्रेसका आचार्यसँग प्रतिस्पर्धामा उभिएका मोदीले भने, ‘संगठनको आन्तरिक व्यवस्थापन मिलाएर चुनावी तयारीमा व्यस्त भएका छौं । मतदातासँग भेटघाट गर्ने क्रम पनि सुरु भएको छ ।’