फुटबल प्रशिक्षक कुमारलाई युरोपमा महत्वपूर्ण अवसर
![फुटबल प्रशिक्षक कुमारलाई युरोपमा महत्वपूर्ण अवसर](https://annapurnapost.prixacdn.net/media/albums/KUMAR-THAPA-5a026f21320f78.12076038_LkvpVIXsPC.jpg)
काठमाडौं : नेपाली राष्ट्रिय फुटबल टोलीका पूर्वखेलाडी एवं महिला टोलीका प्रशिक्षक कुमार थापाले युरोपमा फुटबल व्यवस्थापनसम्बन्धी कोर्समा सहभागी हुने अवसर पाएका छन् । युरोपियन फुटबल महासंघ (यूईएफए) ले सञ्चालन गर्ने फुटबल व्यवस्थापनसम्बन्धी स्नातकोत्तर (एमए) स्तरको यो कोर्स दुई वर्षसम्म चल्नेछ । यही नोभेम्बर १३ तारीखबाट सुरु हुने उक्त कोर्स सन् २०१९ को नोभेम्बर १४ तारिखमा सकिनेछ ।
कोर्सका लागि कुमार १० तारिखमा स्विट्जरल्यान्ड प्रस्थान गर्नेछन् । उक्त कोर्स स्विट्जरल्यान्ड, फ्रान्स, इङ्ल्यान्ड, स्पेन, नेदरल्यान्ड, जर्मनी र अमेरिकामा सञ्चालन हुने जानकारी मंगलबार आयोजित पत्रकारसम्मेलनमा कुमारले दिए । कुमार उक्त कोर्सका लागि छनोट हुने एक्लो एसियाली खेलाडी हुन् । कोर्सको समापनपछि सहभागीले परीक्षा पनि दिनुपर्ने हुन्छ ।
उक्त कोर्समा विश्वका विभिन्न देश र क्लबबाट २५ जनाको सहभागिता रहने जानकारी पनि कुमारले दिए । उनले फुटबलमा लागेका कारण पाएको यो उपलब्धि आफ्ना लागि निकै महत्वपूर्ण भएको बताए । यो कोर्समा सिकेर आएको ज्ञानलाई आफूले नेपाली फुटबलको विकासमा लगाउने प्रतिबद्धता पनि उनले व्यक्त गरे ।
कोर्सका लागि कुमारले यूईएफएबाट २७ हजार युरो छात्रबृत्ति पनि प्राप्त गरेका छन् । उक्त रकम पर्याप्त नहुने भएकोले उनले खेलकुदसँग सम्बन्धित निकायसँग पनि सहयोगका लागि अनुरोध गरेका छन् । पत्रकारसम्मेलनमा फुटबल विश्लेषक नवीन पाण्डेलगायतले कुमारको यो अभियानलाई सबैले सहयोग गर्नुपर्ने धारणा व्यक्त गरे ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)