विपक्षीको प्रभाव क्षेत्र तोड्ने कसरत

 फिदिम : कांग्रेसबाट प्रतिनिधिसभा सदस्य उम्मेदवार भीष्मराज आङ्देम्बे र प्रदेशसभा सदस्य उम्मेदवार नरेन्द्रकुमार केरुङ एक सातादेखि चुनावी दौडमा सँगै छन् । स्थानीय तह निर्वाचनमा एमालेले जितेका क्षेत्रमा आङ्देम्बे र केरुङको ध्यान केन्द्रित छ ।

 एमालेबाट प्रदेशसभा सदस्य उम्मेदवार गणेश काम्बाङको जन्मस्थानसमेत रहेको याङ्वरक गाउँपालिकामा कांग्रेस उम्मेदवार भोट मागिरहेका हुन् । केरुङ र आङ्देम्बेले स्थानीय निर्वाचनमा एमालेले पकड जमाएको हिलिहाङ र याङ्वरक गाउँपालिकाका मतदाताको ढोका ढकढक्याइरहेका छन् ।

एमालेबाट प्रतिनिधिसभा सदस्य उम्मेदवार बसन्त नेम्बाङ र प्रदेशसभा सदस्य उम्मेदवार काम्बाङले पनि फिदिम नगरपालिका र फालेलुङ गाउँपालिकाका मतदाताको घरआँगन चहारेको एक साता पुगिसकेको छ । स्थानीय निर्वाचनमा यो क्षेत्रबाट कांग्रेस उम्मेदवारले जितेका थिए । कांग्रेस उम्मेदवार केरुङको जन्मस्थान फालेलुङ गाउँपालिका नै भएकाले विपक्षी उम्मेदवार उनको प्रभाव तोड्न लागेका हुन् ।

दुवै गठबन्धनका उम्मेदवारले विपक्षीको प्रभाव क्षेत्रका मतदातालाई फकाएर सहानुभूतिको मत लिने कसरत गरेका हुन् । ‘आफ्नो पकड क्षेत्र त छँदै छ', केरुङले भने, ‘जस्तोसुकै अवस्थामा पनि पकड क्षेत्रका जनताले भोट दिन्छन् । तर, जितलाई सहज बनाउन विपक्षीको पकड क्षेत्र तोड्न जरुरी छ ।'

आङ्देबेले संविधानसभा निर्वाचनमा आफूले जितेको क्षेत्र छाडेर एमालेले जितेको क्षेत्रलाई बढी ध्यान दिएका छन् । ‘सबै क्षेत्रका मतदाताको घरमा पुग्ने योजना छ', उनले भने, ‘यसपटक समय छोटो र ठूलो क्षेत्र भएकाले नयाँ क्षेत्रलाई बढी ध्यान दिएका हौं ।'

निर्वाचन जित्न पार्टी कमजोर रहेका क्षेत्रको मत चाहिएको नेम्बाङको भनाइ छ । भने, ‘विपक्षीको मत तानेरै चुनाव जित्ने हो ।'