पौडेललाई गिरीको टक्कर
बुटवल : रूपन्देही क्षेत्र नम्बर २ मा एमाले उपमहासचिव विष्णु पौडेललाई कांग्रेस महासमिति सदस्य युवराज गिरीले टक्कर दिँदै छन् । पौडेलले दोस्रो संविधानसभा निर्वाचनमा माओवादी उम्मेदवार पूर्वप्रधानमन्त्री डा. बाबुराम भट्टराईलाई झन्डै साढे ६ हजार मतले हराएका थिए ।
यसपटक उनी माओवादीसँगकै गठबन्धनमा उम्मेदवार बनेका छन् । यसपटक पनि जित हासिल गर्ने उनको दाबी छ । उनका विगतका प्रतिस्पर्धी कांग्रेसका सूर्यप्रसाद प्रधानको निधनपछि यसपटक गिरी उम्मेदवार बनेका हुन् । प्रदेश नम्बर ५ को राजधानी रूपन्देही बनाउनेलगायत आर्थिक विकासका एजेन्डा लिएर मतदातामाझ पुगेका गिरीले पनि आफ्नो जित हुने दाबी गरे ।
पौडेलले केन्द्रको राजनीतिसँगै रूपन्देहीको विकासमा आमूल परिवर्तन गरेको बताउँदै आएका छन् । ‘गौतमबुद्ध विमानस्थलदेखि अन्तर्राष्ट्रिय सम्मेलन केन्द्र निर्माणको काम मेरै नेतृत्वमा भएको छ', उनले भने, ‘रूपन्देहीलाई विकासको क्षेत्रमा नमुना बनाउनका लागि मतदाताले अरू विकल्प खोज्नै सक्दैनन् ।'
पौडेललाई जनताले पटक-पटक हेरिसकेकाले यसपटक आफूलाई मत प्राप्त हुने गिरीको भनाइ छ । ‘मेरो दुःखसँग उहाँको (विष्णु पौडेल) तुलना हुँदैन, मैले भूगोलमै बसेर जनताको घरदैलोमा गरेको कामको मूल्यांकन हुनेछ, उनले भने ।
क्षेत्र नम्बर २ मा पर्ने बुटवल उपमहानगरपालिकामा कांग्रेस र माओवादी केन्द्रको गठबन्धन भए पनि एमालेले झन्डै तीन हजार मतले जित हासिल गरेको थियो । स्थानीय तहमा वडाध्यक्षलाई खसेको मतका आधारमा वाम गठबन्धन लोकतान्त्रिकभन्दा झन्डै १४ हजार मतले अघि देखिएको छ ।
यो क्षेत्रमा प्रदेशतर्फका दुवै उम्मेदवार एमालेबाटै छन् । प्रदेशसभा १ मा केन्द्रीय सदस्य लीला गिरी र २ मा बुटवलका पूर्वनगर प्रमुख भोजप्रसाद श्रेष्ठको उम्मेदवार छन् । कांग्रेसबाट १ मा मजदुर नेता काजीमान श्रेष्ठ र २ मा बुटवल उद्योग वाणिज्य संघका निवर्तमान अध्यक्ष महेशमान सिंह मैदानमा छन् ।
स्थानीय निर्वाचनपछि झन्डै १५ हजार मतदाता थपिएका छन् । ती मतदाता पनि निर्णायक हुुन सक्ने चर्चा चल्न थालेको छ । यो क्षेत्रमा एक लाख पाँच हजार दुई सय पाँच मतदाता छन् ।