केपी ओलीका प्रतिष्पर्धी भन्छन्- एक मतले जित्छु

दमकः एमाले अध्यक्ष केपी ओलीलाई आफूले एक मतले पराजित गर्ने काँग्रेस झापा क्षेत्र नम्बर ५ का उम्मेदवार डा. खगेन्द्र अधिकारीले ठोकुवा गरेका छन् । चुनाव प्रचार प्रसारमा सबैले आफूलाई र ओलीलाई पनि भोट दिन्छु भनेकोले जनताको मत बराबरी आउने बताए । यद्यपी उनले ओलीको मतदाता नामावलीमा नाम नरहेकोले भोट आफूले आफैंलाई हाल्न नपाउने भएकोले एक मतले जित्ने दाबी गरे ।

 

 उनले भने- ‘मेरो मतदाता नामावलीमा नाम छ त्यसैले म आफूलाई आफैले भोट हाल्न सक्छु तर ओलीको नामावली नभएकोले उनले एक मतले पराजय भोग्नु पर्नेछ । ' शुक्रबार बिहान दमकमा आयोजित पत्रकार सम्मेलनमा बोल्दै उनले आफूलाई धेरै ठाउमा केपी ओलीसँग निहु खोज्न किन आएको भन्ने गरेको प्रसँग सुनाउदै ओली कुनै कालभैरब नभएको टिप्पणी गरे ।

उनले भने,‘ओली कुनै काल भैरब हैनन् जोसँग म डराउनु परोस् ।' आफ्ना प्रतिष्पर्धी ओली साधारण मान्छे भएकोले आफूलाई कहिले पनि डर नलाग्ने गरेको उनले बताए । ओली राजनीतिमा आफू भन्दा खारिएको मान्छे भएको बताउदै अधिकारीले आफू पनि शिक्षामा खारिएकै मान्छे रहेको बताए । लोकतन्त्र नै संकटमा परेको बेला पार्टीले आफूलाई बिश्वास गरेर टिकट दिएको बताउदै उनले यहीँ क्षेत्रका जनताको नोकर बने। बस्न चाहेको बताए ।

उनले भने-‘साढे सत्र बर्ष सरकारको नोकर भएर काम गरे अब जनताको नोकर भएर काम गर्न आएको छु । मलाई राटो नराखी खेत जोत्न आउँछ बिश्वास गरेर हेर्नुस ।' उनले बाम गठबन्धनको ध्रुबिकरणले मुलुकलाई अधोगतिको दिशामा उन्मुख गराएको बताउदै यसलाई रोक्न लोकतान्त्रिक शक्तिहरु एक ठाउमा उभिन आवश्यक रहेको बताए ।