साझा एजेन्डामा प्रादेशिक राजधानी

धनकुटा : निर्वाचन प्रचारमा लागेका सबै दलका उम्मेदवारले प्रदेश नम्बर १ को राजधानी धनकुटा बनाउने मुद्दालाई साझा एजेन्डाका रूपमा उठाएका छन् । लोकतान्त्रिक र वाम गठबन्धनसहित अन्य दलका उम्मेदवारको मुख्य एजेन्डाका रूपमा प्रादेशिक राजधानी परेको हो । धनकुटा साविक पूर्वाञ्चल विकास क्षेत्रको क्षेत्रीय सदरमुकामसमेत हो । प्रतिनिधिसभा र प्रदेशसभा सदस्यका उम्मेदवारहरूले प्रादेशिक राजधानीबाहेक मुद्दालाई पनि प्राथमिकतामा राखेका छन् । उनीहरूले पूर्वाधार व्यवस्थापन, उन्नत कृषि, कृषिमा आधारित उद्योगको विकास, रोजगारी, सुलभ र गुणस्तरीय शिक्षाजस्ता विषय लिएर आआफ्नो पक्षमा मत मागिरहेका छन् ।

 प्रतिनिधिसभा र प्रदेशसभाका लागि धनकुटामा दुई गठबन्धनसहित १३ दलका १९ जना उम्मेदवार रहेको जिल्ला निर्वाचन कार्यालयका सूचना अधिकारी केशव पौडेलले जानकारी दिए । प्रतिनिधिसभामा प्रत्यक्षतर्फ वाम गठबन्धनबाट एमालेका जिल्ला अध्यक्ष राजेन्द्र राई चुनावी मैदानमा छन् । सोही गठबन्धनबाट प्रदेशसभातर्फ क्षेत्र नम्बर १ मा एमालेका निरन राई र २ मा इन्द्रमणि पराजुली उम्मेदवार छन् ।

 लोकतान्त्रिक गठबन्धनबाट राप्रपाका केन्द्रीय महामन्त्रीसमेत रहेका उद्योगमन्त्री सुनीलबहादुर थापा प्रतिनिधिसभा सदस्य उम्मेदवार छन् । सोही गठबन्धनबाट कांग्रेसका निवर्तमान सांसद मनोहरनारायण श्रेष्ठ क्षेत्र नम्बर १ मा प्रदेशसभा सदस्य उम्मेदवार बनेका छन् । संघीय समाजवादी फोरमका केन्द्रीय सदस्य अर्जुन थापा लोकतान्त्रिक गठबन्धनबाट प्रदेशसभातर्फ क्षेत्र नम्बर २ मा उम्मेदवार छन् ।

एमालेका प्रतिनिधिसभा सदस्य उम्मेदवार राईले प्रदेश राजधानी धनकुटा बनाउनु आफ्नो मुख्य एजेन्डा रहेको बताए । भने, ‘धनकुटा हरेक दृष्टिकोणबाट उपयुक्त छ । धनकुटालाई राजधानी बनाउन वाम गठबन्धनले मात्र सक्छ ।'

लोकतान्त्रिक गठबन्धनबाट प्रतिनिधिसभा सदस्य उम्मेदवार थापाले पनि धनकुटालाई प्रादेशिक राजधानी बनाउने एजेन्डालाई मुख्य रूपमा उठाएका छन् । भने, ‘अघिल्लो निर्वाचनमा मैले गरेका वाचा पूरा गरेको छु । अबको मेरो उम्मेदवारी धनकुटालाई प्रदेशिक राजधानी बनाउनेदेखि आर्थिक समृद्धिसम्मको हो ।'

धनकुटा नगरपालिकामा सरकारी स्वामित्वका तीन सय ९१ भवन छन् । सहरी विकासका नाममा करिब तीन सय रोपनी, नेपाल ट्रस्टका नाममा एक सय ९४, पर्यटन कार्यालयका नाममा एक सय ३४, विद्युत् प्राधिकरणका नाममा दुई सय रोपनी जग्गा छ । सरकारी स्वामित्वको ४८ हजार ६ सय ३५ रोपनी सार्वजनिक जग्गा रहेको तथ्यांक छ ।

धनकुटाको बेलहारा डाँडामा हवाई मैदान निर्माणाधीन छ । धनकुटा परापूर्वकालमा पनि पूर्वकै प्रमुख प्रशासनिक तथा न्यायिक केन्द्र गौंडाका रूपमा स्थापित थियो । पछि पञ्चायती व्यवस्थामा २०२९ सालमा देशलाई विकेन्द्रीकरण गर्ने अवधारणाअनुरूप (पहिले ४ र पछि २०३१ सालमा ५) विकास क्षेत्रमा विभाजन गर्दा पूर्वाञ्चलको प्रमुख प्रशासनिक केन्द्रका रूपमै मान्यता दिइएको थियो ।

धनकुटा पहिलेदेखि नै प्रशासनिक केन्द्रका रूपमा रहँदै आएकाले राजधानी बनाउँदा कुनै विवाद नहुने पत्रकार महासंघ धनकुटाका अध्यक्ष राजेश्वरवहादुर श्रेष्ठको तर्क छ । यहाँ एक लाख पाँच हजार एक सय ८८ जना मतदाता छन् ।