‘प्रदेश २ मा बहुमत ल्याउँछौं'
काठमाडौं : गठबन्धन बनाएर निर्वाचनमा होमिएका संघीय समाजवादी फोरम र राष्ट्रिय जनता पार्टीले प्रदेश २ मा बहुमतको सरकार बनाउने दाबी गरेका छन् । स्थानीय तह निर्वाचनमा कुल ५१ स्थानमा जित्दै कांग्रेस र वाम गठबन्धनलाई पछाडि पारेका उनीहरूले प्रतिनिधिसभाका ३२ र प्रदेशसभाका ६४ स्थानमध्ये बहुमत सिट जित्ने दाबी गरेका हुन् ।
अन्तिम समयसम्म प्रदेश २ मा ६० प्रतिशत सिट दाबीसहित कांग्रेससँग तालमेल प्रयास गरेका उनीहरूले आठवटै जिल्लामा कांग्रेससँगै प्रतिस्पर्धा हुने बताएका छन् । गठबन्धनका नेता तथा पर्सा क्षेत्र ४ का उम्मेदवार लक्ष्मणलाल कर्णले प्रदेश २ मा कांग्रेससँग प्रतिस्पर्धा हुने बताए । बारा, पर्सा, सर्लाही र रौतहटमा गठबन्धनको पक्षमा लहर आएको उनले दाबी गरे ।
वाम गठबन्धनका बलिया नेता माधवकुमार नेपाल काठमाडौं-२ मा गएपछि यहाँको चुनावी माहोल मधेसी गठबन्धनको पक्षमा आएको कर्णले बताए । ‘प्रदेश २ का दुवै सदनमा बहुमत हासिल गर्नु गठबन्धनको उद्देश्य हो', उनले भने, ‘हामी प्रदेश २ मा सरकार गठन गर्ने गरी चुनावी अभियानमा छौं ।'
‘पहिचानसहितको संघीयता र संघीयतासहितको संविधान' मूल नारा तय गरेर अघि बढेको मधेसी गठबन्धनले १३ महिने मधेस आन्दोलन र सातमहिने नाकाबन्दीलाई जितको प्रमुख आधार मानेको छ ।
मधेसी गठबन्धनले १३ महिने मधेस आन्दोलन र सातमहिने नाकाबन्दीलाई जितको प्रमुख आधार मानेको छ ।
फोरम नेपालका महासचिव एवं पर्सा प्रदेशसभा क्षेत्र १ ‘ख' का उम्मेदवार लालबाबु राउतले प्रतिनिधिसभातर्फ १८ र प्रदेशसभामा ४० हाराहारी सिट जित्ने दाबी गरे । राजपा महासचिव केशव झाले अहिलेसम्मको माहोल हेर्दा गठबन्धनको चुनावी प्रतिस्पर्धा कांग्रेससँगै रहेको बताए । उनले भने, ‘मधेस आन्दोलनका योद्धा मधेसी समुदाय स्थानीय चुनावमा भन्दा प्रतिनिधिसभा र प्रदेशसभा चुनावमा अझै सक्रिय रहेकाले परिणाम सोचेभन्दा राम्रो हुन्छ ।'
फोरम नेपालका नेता शिवजी यादवले फोरम अध्यक्ष यादव र राजपा अध्यक्ष ठाकुरले सहजै जित्ने र अध्यक्षमण्डलका अन्य नेता पनि अग्रमोर्चामा रहेको बताए । उनले सप्तरी, सिरहा, धनुषा र महोत्तरीमा सहजै बहुमत सिट जित्ने दाबीसमेत गरे । मोर्चाका प्रमुख नेतामध्ये उपेन्द्र सप्तरी-२, महन्थ महोत्तरी-३, राजेन्द्र धनुषा-३, शरत्सिंह महोत्तरी-२, महेन्द्र सर्लाही-२, राजकिशोर सिरहा-४ र अनिल रौतहट-१ बाट उम्मेदवार छन् ।