आचारसंहिता उल्लंघन नगर्न चेतावनी
गोरखा : नेपाली कांग्रेसका महामन्त्री शशांक कोइरालाले नेपालमा साम्यबाद रोक्न लोकतान्त्रिक गठबन्धनले जित्नुपर्ने तर्क गरेका छन् । आइतबार गोरखाको हिमालपारिको सिर्दिबास पुगेका कोइरालाले एमाले र नेकपा माओबादी केन्द्रले संबिधानसभाबाट जारी भएको संबिधान आफूखुसी संशोधन गर्न वामगठबन्धन गरेको आरोप लगाए ।
कोइरालाले कांग्रेसको नेतृत्वमा देशले संबिधान पाएको दाबी गर्दै कांग्रेस नेतृत्वको लोकतान्त्रिक गठबन्धनले जितेमा विकास र संबृद्धि आउने दावी गरे । उनी त्यस क्षेत्रका प्रतिनिधिसभा उम्मेद्वार चीनकाजी श्रेष्ठ, प्रदेशसभा राजेन्द्र बजगाईँ, समानुपातिक उम्मेद्वार हरि घले र कमला पन्तलाई साथमा लिएर हेलिकोप्टर चढेर मान्वु, काशीगाउँ, केरौंजा र सिर्दिवासमा आयोजित चुनावी सभा सम्बोधन गर्न पुगेका थिए ।
यसैबीच नेपाली कांग्रेसका उम्मेद्वार राजेन्द्र बजगाईँले बारम्बार हेलिकोप्टर चार्टर गरी चुनावी कार्यक्रममा सहभागी भए जनप्रतिकार गर्ने चेतावनी बाम गठबन्धनले दिएको छ । आइतबार पत्रकार सम्मेलन गरी गठबन्धनका नेता चुडामणि खड्काले जनप्रतिकारबाट पर्ने असरको जिम्मेवारी सम्बन्धित उम्मेद्वारले नै लिनुपर्ने उनले तर्क गरे ।
गोरखा क्षेत्र नं. १ प्रदेश ‘ख'का नेपाली कांग्रेसका उम्मेद्वार राजेन्द्र बजगाईँले पटक पटक हेलिकोप्टर प्रयोग गरेर चुनावी कार्यक्रम गरेको गठबन्धनको आरोप छ । बजगाईँ काङ्ग्रेस महामन्त्री शशांक कोइरालाको नाममा स्वीकृति लिइएको हेलिकोप्टर चढेर सिर्दिबास, केरौंजा, काशिगाउँ र मान्बु पुगेका थिए । निर्वाचन आयोगका प्रवक्ता नवराज ढकालले सो हेलिकोप्टर स्वीकृति लिएर चार्टर गरिएको पुष्टि गरेका छन् । तर हेलिकोप्टर चार्टरप्रति असन्तुष्ट जनाउँदै वाम गठबन्धनले आचारसंहिता विपरित हेलिचार्टर गरिएको दाबी गरेको छ ।
‘महामन्त्रीलाई हेलिकोप्टर प्रयोग गर्न पाउने अधिकार त छ, तर उहाँको नाममा हेलिकोप्टर दर्ता गरेर आचारसंहिताको धज्जी उँडाएर काङ्ग्रेसका उम्मेद्वार चार ठाउँको कार्यक्रममा पुगेका छन्' नेता खड्काले भने ।
उम्मेद्वार बजगाईँले आउँदो मंसिर दुई गते पनि महामन्त्री कोइराला गोरखाको बिभिन्न ठाउँका लागि हेलिकोप्टर प्रयोग गरी आउने जनाएका छन् । तर बाम गठबन्धनले भने सो दिनमा शशांक चढेको हेलिकोप्टरमा उम्मेद्वार चढेमा जनप्रतिरोध गर्ने चेतावनी दिएका छन् ।
आचारसंहिता उल्लंघन भएको भन्दै माओवादी केन्द्र र एमालेले अलग अलग उजुरी दिएको मुख्य निर्वाचन अधिकृत वसन्तराज पौडेलले जनाए । साथै दुवै दिनका लागि उम्मेद्वारले स्वीकृति लिएको पत्र पेश गरेको पनि पौडेलले जनाएका छन् ।