उम्मेदवारमाथि आक्रमण गर्नेलाई कारबाही हुन्छ : प्रधानमन्त्री
नेपालगन्ज : प्रधानमन्त्री शेरबहादुर देउवाले निर्वाचनका बेला उम्मेदवारमाथि भइरहेका आक्रमणका दोषीलाई कडा कारवाही हुने बताएका छन् । ठाउँठाउँमा भइरहेका आक्रमण तथा चुनाव विथोल्ने क्रियाकलापलाई सरकार तथा गृहमन्त्रालयले समेत गम्भीर रुपमा हेरिरहेको भन्दै उनले ती घटनामा संलग्नलाई कारबाही हुने बताए ।
पश्चिमका जिल्लामा चुनावी कार्यक्रममा भाग लिन निस्किएका प्रधानमन्त्री देउवाले मंगलबार नेपालगन्ज विमानस्थलमा पत्रकारसँग संक्षिप्त कुराकानी गर्दै यस्तो बताएका हुन् ।
‘छिटफुट घटनाहरु भइरहेका छन् तर, सरकारले चुनाव सुरक्षित र भयरहित बनाउनका लागि लागिपरेको छ’ प्रधानमन्त्री देउवाले भने ‘त्यस्ता घटनामा संलग्नलाई कारबाहीका लागि गृहमन्त्रालय अनि सरकारले सबै सुरक्षा निकायलाई निर्देशन दिइसकेको छ ।’
नेपालगन्जमा मंगलबार भएका मध्यपश्चिम सुरक्षा गोष्ठीलाई समेत उनले सम्बोधन गरेका छन् । त्यसक्रममा प्रहरी महानिरीक्षक (आइजीपी) प्रकाश अर्याल पनि सहभागी थिए ।
कार्यक्रम सबै सुरक्षा अंगका प्रमुखलाई सम्बोधन गर्दै प्रधानमन्त्री तथा गृहमन्त्री देउवाले निर्वाचनलाई भयरहित र सुरक्षित बनाउन निर्देशन दिए । ‘चुनाव नजिकिइरहेको छ, चुनाव विरोधी अवाञ्छित गतिविधिहरु पनि भइरहेका छन्, त्यस्ता क्रियाकलापलाई तुरन्त रोक्नुहोस् र कारबाही गर्नुहोस्’ प्रधानमन्त्री देउवाले भने ‘सरकार यो चुनाव भयरहित, शान्त र सुरक्षित चाहन्छ, त्यहीअनुरुप तपाईँहरु पनि मतदाता, उम्मेदवार र चुनावी सुरक्षामा खटिनुहोस् ।’
प्रधानमन्त्री देउवा आफ्नो गृहजिल्ला तथा निर्वाचन क्षेत्र डलेलधुरालगायतका जिल्लामा हुने चुनावी अभियानमा सहभागी हुन पश्चिम नेपालको भ्रमणमा निस्किएका हुन् ।