नारायणकाजीलाई भोट माग्दै ओली-प्रचण्ड
पालुङ्टार : नयाँ शक्तिका संयोजक तथा प्ूर्वसहयोद्धा बाबुराम भट्टराईसँग चुनावी प्रतिस्पर्धा गरिरहेका गोरखा-२ का प्रतिनिधिसभा उम्मेदवार नारायणकाजी श्रेष्ठका लागि भोट माग्न कम्युनिस्ट गठबन्धनका मुख्य नेताद्वय केपी शर्मा ओली र पुष्पकमल दाहाल बुधबार गोरखा आएका छन् । अलग-अलग हेलिकोप्टर चढेर उनीहरू गोरखाको भच्चेक, पालुङ्टार, आरुघाट र घैरुङ पुगेका हुन्।
मध्याह्न १२ बजेदेखि सुरु हुने भनिएको पालुङ्टारको कार्यक्रममा दाहाल ३ बजे पुगेका थिए । करिब आधा घन्टापछि ओली अर्को हेलिकोप्टर चढेर पुगेका थिए । पछिल्लो चरणमा घैरुङ र आरुघाटमा आयोजित कार्यक्रममा दुवैजना जाने कार्यक्रम रहे पनि समय अभावका कारण आरूघाटमा ओली मात्र र घैरुङमा दाहाल सम्बोधन गर्न पुगेका थिए ।पालुङ्टारमा आयोजित कार्यक्रममा करिब पाँच हजार जनाको उपस्थिति थियो ।
चुनावी सभामा करिब ४५ मिनेट सम्बोधन गरेका एमाले अध्यक्ष ओलीले लामो समय कांग्रेस र नयाँशक्तिलाई गाली गरेर बिताएका थिए । ‘वाम एकताले नेपालबाट कांग्रेसको बुढो रूख ढल्यो-ढल्यो । कांग्रेसलाई नेपालबाट बढार्यो-बढार्यो' ओलीले थपे, ‘म भन्छु नेपालको इतिहासमा कांग्रेसको अन्तिम प्रधानमन्त्री शेरबहादुर देउवा हुन् । मिति तोक्नुपर्छ भने तोकिदिन्छु । नेपालमा कांग्रेसले शासन गर्ने भनेको पुस मसान्तसम्म मात्र हो । त्यसपछि नेपालको इतिहासमा कांग्रेसको शासन कहिल्यै आउँदैन । कांग्रेसका साथीप्रति म एकदमै समवेदना प्रकट गर्न चाहन्छु ।'
उनले कांग्रेसको टाट पल्टिसकेको भन्दै आलोचना गरे । ‘बिपी कोइरालाको, गणेशमानको पालाको कांग्रेसको कुरा गरेर हुन्छ आज टाट पल्टिएको कांग्रेसले नयाँ शक्तिसँग गठबन्धन गरेर अर्को हास्यास्पद खेल खेलेको टिप्पणी उनले गरे । ‘कांग्रेस आत्तिएको छ । यो ठाउँका कांग्रेसलाई देखेर टीठ लागेको छ', उनले भने, ‘यता वाम एकता भयो भने शेरबहादुरजीले जो पायो, त्यहीसँग एकता गरेका छन् । पार्टीसँग एकता गरेको भए पनि हुन्थ्यो नि ! नयाँ शक्तिमा अध्यक्ष एक जना र केही कलाकारबाहेक कोही पनि बाँकी छैन । अलि अलि थिए, त्यही पनि मैले हिजो एमालेमा समावेश गर्दिसकें । अब एकजना अध्यक्ष मात्र छ बाँकी केही पनि छैन । यस्तोसँग कांग्रेसले के गठबन्धन गरेको होला वाम गठबन्धनबाट उम्मेदवार बनेका सबै उम्मेदवारलाई मत दिन उनको आग्रह थियो ।
सम्बोधनकै क्रममा माओवादी अध्यक्ष दाहालले कम्युनिस्ट केन्द्रको विकल्प नभएको बताए । कम्युनिस्ट केन्द्र बनाउनेबारे पार्टीसचिव मदन भण्डारी रहेकै बेला थालनी भएको दाहालले बताए । ‘तत्कालीन पार्टीसचिव मदन भण्डारीसँग पार्टी एकताबारे छलफल भएको थियो र जेठ ११ गते टुंगो लगाउने समझदारी बनेको थियो । त्यो डिनर मिटिङ कुन घरमा गर्ने, कसले आयोजना गर्ने भन्ने पनि टुंगो लागिसकेको थियो', उनले भने, ‘तर दुर्भाग्य, त्यो जेठ ११ गते आउनै पाएन । कमरेड भण्डारीको जेठ ३ गते नै देहाबसान भयो । त्यो जुन अधुरो सपना हामीले देखेका थियौं, कमरेड केपी ओली पार्टी अध्यक्ष भएको बेला साकार भएको छ । राजनीतिक स्थिरताका निम्ति, नेपालको कम्युनिस्ट आन्दोलन सफलताका निम्ति र जनताको आर्थिक विकास र समृद्धिको निम्ति कम्युनिष्ट केन्द्रको जरुरी छ भनेर यो कदम चालिएको छ ।'
कम्युनिस्ट केन्द्र बनाउने अभियानले कांग्रेस अत्तालिएको उनले टिप्पणी गरे । ‘क्रान्तिकारी, परिवर्तनकारी कम्युनिस्टहरूको शतप्रतिशत सफल हुने गरी एउटा बलियो कम्युनिस्ट केन्द्र बनाउने संकल्प गरेका छौं', उनले भने, ‘यसले देशभक्त कांग्रेस र देशभक्त अन्य पार्टीले पनि सर्वत्र स्वागत गरेका छन् तर अर्काथरी प्रतिक्रियावादी र अवसरवादी तत्वको निद खल्बल्लिएको छ, उनीहरू आतंकित भएका छन् । अझै पनि म कांग्रेसका निष्ठावान, इमानदार कार्यकर्तालाई उल्टो बुद्धितिर नलाग्न आग्रह गर्छु ।'
गिरिजाप्रसाद कोइरालाले आफ्नो जीवनको अन्तिम समयमा शान्ति प्रक्रियाको बाँकी कार्यभार पूरा गर्न आफूलाई जिम्मा लगाएको उनले दोहोर्याए । ‘यदि, तपाईंहरू शान्ति प्रक्रियाप्रति साँच्चै इमानदार हो, गिरिजाप्रसाद कोइरालाले अपनाएको बाटोमा हो भने सक्नुहुन्छ हँसिया-हथौडामा भोट हाल्नुहोस्, सक्नुहुन्न भने चुनाव चिह्न रूखै लिएर आउनुहोस् हामीसँग प्रतिस्पर्धा गर्न । अरूथोक बोकेर नहिँड्नुहोस् । मलाई लाग्छ, इमानदार कांग्रेसले यो कुरा बुझेका छन् । उनीहरू सबैले उल्टो बाटो हिँड्ने पार्टी केन्द्रको निर्णयको विद्रोह गर्नेछन् । त्यो विद्रोह न्यायको पक्षमा हुनेछ । त्यो विद्रोह राष्ट्रको पक्षमा हुनेछ ।'