विप्लवका विद्यार्थी नेता पक्राउ

विराटनगर : प्रतिनिधिसभा र प्रदेशसभा निर्वाचनविरुद्ध गतिविधि गरेको अभियोगमा मोरङको कानेपोखरीबाट विप्लव नेत्रृत्वको नेपाल कम्युनिष्ट पार्टीका विद्यार्थी नेता पक्राउ परेका छन् ।

इलाका प्रहरी कार्यालय पथरीको टोलीले अनेरास्ववियु क्रान्तिकारीका मोरङ अध्यक्ष कानेपोखरी गाउँपालिका ४ वयरवनका २१ वर्षीय फणिन्द्र राजवंशीलाई पक्राउ गरेको हो । मोरङ प्रहरी प्रमुख एसपी अरुणकुमार बिसीका अनुसार राजवंशीलाई कानेपोखरीको केरौनबाट पक्राउ गरिएको हो । उनी विरुद्ध प्रहरीले शुक्रबार सार्वजनिक अपराध ऐन अन्तर्गत मुद्धा चलाउन म्याद थप गरी अनुसन्धान अघि बढाएको छ ।

निर्वाचनका विरुद्धमा भित्ते लेखन गर्ने, मतदाता भड्काउने र तर्साउनेलगायतका गतिविधिमा संलग्न भएको अभियोगमा राजवंशीलाई पक्राउ गरिएको प्रहरीले जनाएको छ । त्यस्तै प्रहरीले एक साताको अवधिमा निर्वाचन विरोधी गतिविधि गरेको भन्दै राजवंशीसहित चारजना विप्लवका नेता कार्यकर्तालाई मोरङबाट पक्राउ गरिसकेको छ ।

एसपी बिसीका अनुसार पार्टीका केन्द्रीय सदस्य ताप्लेजुङ फोक्ताङ ९ का ४० वर्षीय सुमन लिम्बू र पार्टीका कोसी व्यूरो सदस्य मोरङको मिक्लाजुङ ८ का ४४ वर्षीय जितेन्द्र महरालाई पक्राउ गरिएको छ । उनीहरुलाई विराटनगर १० स्थित न्युरो अस्पतालबाट पक्राउ गरिएको प्रहरीले जनाएको छ । प्रहरीका अनुसार लिम्बू केही दिनअघि दुर्घटनामा परेर घाइते भएपछि उपचारका लागि न्युरो अस्पतालमा भर्ना भएका थिए । उपचाररत अवस्थाका लिम्बूलाई भेट्न आएका महरा र उनलाई एकैसाथ प्रहरीले पक्राउ गरेको हो ।

त्यस्तै पार्टीका एरिया इन्चार्ज विराटनगर ६ का ६० वर्षीय कमलबहादुर खत्री (नेपाल) लाई पनि प्रहरीले पक्राउ गरेको छ । निर्वाचन विरोधी गतिविधी गरेको अभियोगमा प्रहरीले उनलाई घरैबाट पक्राउ गरेको हो । पक्राउ परेका विप्लव नेत्रृत्वको नेपाल कम्युनिष्ट पार्टीका नेता कार्यकर्ता विरुद्ध सार्वजनिक अपराध ऐनअन्तर्गतको मुद्धा दर्ता गरेर अनुसन्धान अघि बढाइएको जानकारी एसपी बिसीले दिए ।