हिमालयन शेर्पा फाइनलमा

काठमाडौं : यती हिमालयन शेर्पा क्लब प्रथम चन्द्रागिरि गोल्डकप फुटबल प्रतियोगिताको फाइनलमा प्रवेश गरेको गरेको छ । नैकापस्थित चन्द्रागिरि नगरपालिकाको खेलमैदानमा आइतबार भएको खेलमा हिमालयन शेर्पाले विभागीय टोली त्रिभुवन आर्मी क्लबलाई १-० गोलले हरायो । प्रतिस्पर्धात्मक खेलमा हिमालयन शेर्पाका त्रिदेव गुरुङले ५६औं मिनेटमा गरेको गोल नै निर्णायक बनेको थियो ।

गोलरक्षक अर्पण कार्कीले रिलिज गरेको लामो बललाई आर्मीका रक्षकबीच तालमेल नमिलेको अवस्थामा त्रिदेवले गोल गरेका थिए । उपाधिका लागि शेर्पाले मंगलबार एनआईबीएल फ्रेन्डस् क्लबसँग प्रतिस्पर्धा गर्नेछ । फ्रेन्डस्ले शनिबार सीएमजी क्लब संकटालाई १-० गोलले नै पराजित गर्दै फाइनमा स्थान बनाएको थियो । आर्मीले सुरुदेखि नै गोलको मौका बनाए पनि सफल हुन सकेको थिएन ।

खेल सुरु भएको १०औं मिनेटमा एरिक विष्टको फ्रिकिकलाई हिमालयन शेर्पाका डिफेन्डरले क्लियर गर्दा आर्मी खेलमा अग्रता लिनबाट चुकेको थियो । २१औं मिनेटमा हिमालयन शेर्पाका पियुस हेनरी गोल गर्नबाट चुके । २५औं मिनेटमा हेनरीको पासमा त्रिदेवले गोल गर्न सकेन् । २६औं मिनेटमा आर्मीका एरिक विष्टको प्रहारलाई गोलरक्षक अर्पण कार्कीले मुस्किलले बचाएका थिए ।

यसैगरी ३६औं मिनेटमा नरेश मेचेको प्रहारलाई गोलरक्षक कार्कीले पन्च गर्दै विफल पारेका थिए । दोस्रो हाफको सुरुमै हिमालयन शेर्पाका पियुस हेनरी वान भर्सेस वानको स्थितिमा गोल गर्नबाट चुकेका थिए । ४९औं मिनेटमा हिमालयन शेर्पाका कप्तान मानबहादुर तामाङले वान भर्सेस वानको अर्को मौका गुमाए ।

७१औं मिनेटमा पियुस हेनरी गोल गर्न चुक्दा हिमालयन शेर्पाले अग्रता दोब्बर बनाउने मौका गुमायो । ८०औं मिनेटमा हिमालयन शेर्पाका कप्तान मानबहादुर तामाङले खाली पोस्टमा गोल गर्न सकेनन् । आर्मीले समेत दोस्रो हाफमा राम्रो मौका बनाए पनि गोल गर्न सकेन । उक्त खेलमा हिमालयन शेर्पाका सजित मोरान म्यान अफ दि म्याच घोषित भए । उनले तीन हजार रुपैयाँ पुरस्कार प्राप्त गरे।

ब्राइट युथ क्लब नैकापको आयोजनामा नकआउटका आधारमा कात्तिक २८ गतेबाट जारी उक्त प्रतियोगितामा आयोजकसहित ‘ए’ डिभिजनका सातवटा टोलीले भाग लिएका छन् । सहभागी टोलीलाई दुई समूहमा विभाजन गरिएको थियो । प्रतियोगिताको विजेताले पाँच लाख रुपैयाँ पुरस्कार प्राप्त गर्नेछ । उपविजेताले दुई लाख ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडी र सर्वाधिक गोलकर्ताले पनि जनही ३० हजार रुपैयाँ पुरस्कार प्राप्त गर्नेछन् ।