दीक्षान्तमा दंग
![दीक्षान्तमा दंग](https://annapurnapost.prixacdn.net/media/albums/dikshant-5a13d112d34923.93631340_f2BthjQtmK.jpg)
काभ्रे: पत्नी मायालाई लिएर काभ्रे चौकोट पुगेका महेन्द्र पाण्डे मख्ख देखिन्थे । सोमबार काठमाडौंं विश्वविद्यालयको २३औं दीक्षान्त समारोहमा ‘ह्याट' र ‘सुट'मा सजिएका दुई छोरा अनिल र सुनिललाई हेरेर उनीहरू मुस्कुराइरहेका थिए ।
नेपाल आर्मीको हवल्दारबाट अवकाश लिएका पाण्डेको चाहना छोराहरू ‘स्टेथेस्कोप' लिएर गाउँगाउँमा सेवा गर्न जाउन् भन्ने छ । ‘छोराहरूले देशको सेवा गरुन् भन्ने इच्छा छ । पैसा कमाउन् भन्ने उद्देश्य छैन । नाम र इज्जत कमाउन् भन्ने चाहना छ', उनले भने ।
अभिभावकसँग टाढिएर भरतपुरमा साढे पाँच वर्ष बिताउँदा आत्तिएकी अञ्जली दत्त पनि मिहिनेतको फल पाउँदा दंग देखिन्थिन् । ‘घरपरिवारबाट टाढा रहेर गरेको मिहिनेत मीठो फलमा बदलिएको छ । एकदम खुसी छु', सुनसरीकी दत्त भन्छिन्, ‘गृहजिल्लातिरै गएर बिरामीको सेवा गर्ने सोच बनाएकी छु ।' अञ्जलीजस्तै चिकित्साका विद्यार्थी दीक्षान्त समारोहमा अभिभावकका साथ मख्ख देखिन्थे । इटहरीकी शान्ति जिमी पनि नर्सिङमा स्नातक पूरा गरेको अवसरमा सेल्फी लिन व्यस्त थिइन् । नेपालमै बसेर बिरामीको हेरचाह गर्ने आफ्नो लक्ष्य रहेको उनको भनाइ छ ।
विद्यार्थीको शैक्षिक पर्व मानिने दीक्षान्त समारोहमा रमाइरहेका बेला नेपाल मेडिकल काउन्सिलकी सदस्य एवं काठमाडौं मेडिकल कलेजकी प्रिन्सिपल डा. चन्दा कार्की पनि दंग थिइन् । ‘साढे पाँच वर्षमा लाखौं लगानी भएको हुन्छ । किसानले मंसिरमा धान भिœयाउँदा पाएको खुसीजस्तै हो, यतिबेला विद्यार्थीका लागि', उनले भनिन् । नाम, दाम पर्याप्त हुने भएकाले चिकित्सा पेसामा आकर्षण बढिरहेको उनको भनाइ छ । तर, सेवा भावनालाई आत्मसात् गर्दै यो पेसाको संवेदनशीलतालाई बुझेर लाग्न उनी सुझाव दिन्छिन् ।
नेपालमा अध्ययन गरी विदेशमा गएर सेवा गर्नेहरूको संख्या पनि उत्तिकै छ । चितवनमा पढेकी काठमाडौं, दक्षिणकालीकी सविना गिरी एक वर्षको अनुभव लिएर विदेश जाने सोचमा छिन् । भन्छिन्, ‘केही अनुभव लिएर जाँदा सजिलो हुन्छ ।' काठमाडौं विश्वविद्यालयको २३औं दीक्षान्त समारोहमा यो वर्ष एमडी, एमएस गरेका ६ जना, एमबीबीएस गरेका ५१ जना, बिडिएस गरेका २७ जना दीक्षित भएका छन् । त्यस्तै, बीएस्सी नर्सिङका ३०, ब्याचलर इन नर्सिङ साइन्सका २७ र ब्याचलर इन फिजियोथेरापीका १९ जना दीक्षित भए ।
ड्रोनबाट क्लिक क्लिक
दीक्षान्त परिसरमा मोबाइल र डीएसएलआर क्यामेरामा डाक्टरले तस्बिर लिइरहँदा इन्जिनियरिङका विद्यार्थी भने ड्रोन क्यामेरा चलाएर दीक्षान्त समारोहको सामूहिक तस्बिर लिन व्यस्त थिए । काभ्रे, पनौतीका संघर्ष थापाको नेतृत्वमा तीन जनाले दिनभर ड्रोन उडाउँदै तस्बिर लिइरहेका थिए । काठमाडौं विश्वविद्यालयको सिभिल जियोमेट्रिक विभागमा शिक्षण सहायकका रूपमा कार्यरत थापाले यूएभीबाट तस्बिर लिएको बताए । रिमोट कन्ट्रोलबाट आकाशमा उडाउँदै उनीहरूले झन्डै दुई घन्टासम्म तस्बिर लिएका थिए ।
समारोहका मुख्य आकर्षण कैद गरिएको उल्लेख गर्दै थापाले भने, ‘क्लिप्सहरू लिएका छौं । एक घन्टाको भिडियो बनाउन सकिन्छ ।' उनलाई कैलालीका मोहन देउवा र बैतडीका नवीनराज भट्टले सहयोग गरेका थिए । काठमाडौं विश्वविद्यालयका प्राध्यापक रमेश मास्केका अनुसार दीक्षान्त समारोहमा सुरक्षा निकायबाट अनुमति लिएर पहिलो पटक ड्रोन उडाइएको हो । इन्जिनियरिङको दीक्षान्त समारोहमा पनि ड्रोन प्रयोग गर्ने योजना रहेको उनले बताए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)