राजेन्द्र र अजम्बरको पहिलो टक्कर
भोजपुर: पहिलो चरणमा निर्वाचन हुन लागेको भोजपुरमा राजनीतिक चहलपहल उत्कर्षमा पुगेको छ । भोेजपुरमा प्रदेशसभातर्फ दुई र प्रतिनिधिसभातर्फ एक निर्वाचन क्षेत्र छन् ।
प्रदेशसभाका लागि क्षेत्र नम्बर (क)मा वाम गठबन्धनबाट एमाले नेता राजेन्द्रकुमार राई र लोकतान्त्रिक गठबन्धनबाट संघीय समाजवादी फोरमका नेता अजम्बर राई काङमाङ चुनावी मैदानमा छन् । यी दुई समकालीन नेताबीच कडा प्रतिस्पर्धा हुने आकलन भइरहेको छ ।
राजेन्द्र र अजम्बर पहिलो पटक चुनावमा आमनेसामने भएका हुन् । राजेन्द्र पहिलो पटक उम्मेदवार भएका हुन् भने अजम्बर दोस्रो पटक । दोस्रो संविधानसभा निर्वाचनमा अजम्बरले तेस्रो स्थानको मत ल्याएका थिए । राजेन्द्रलाई माओवादी केन्द्रको साथ छ भने अजम्बरलाई कांग्रेसको ।
नयाँ र पराजय बेहोरिसकेका उम्मेदवारबीचको चुनावी लडाइँ रोचक हुने देखिएको छ । दुवै गठबन्धनका उम्मेदवार मतदातालाई आशा देखाउँदै भोट माग्न व्यस्त छन् । पुराना नेता विगतका निर्वाचनमा गरेका वाचा पूरा गर्न नसकेका कारण देखाउँदै मतदातालाई फुल्याउँछन् भने नयाँ अनुहारका उम्मेदवार पुरानाको कमजोरी औंल्याएर मतदातालाई आफूतिर तान्ने प्रयासमा देखिन्छन् । मतदाता भने विकासलाई प्राथमिकता दिन उम्मेदवारलाई सुझाव दिइरहेका छन् ।
उम्मेदवारहरूले मतदातासामु परिवारका सदस्यलाई रोजगारीदेखि लिएर पूर्वाधार निर्माण, शैक्षिक उन्नति र भरपर्दो स्वास्थ्य सेवालाई प्राथमिकता दिँदै भोट मागिरहेका छन् ।
राजेन्द्रले मुलुकमा आर्थिक समृद्धिको नेतृत्व गर्न वाम गठबन्धन बनेको बताए । सडक, विद्युत्, पुल, खानेपानी, सिँचाइ, शिक्षा, स्वास्थ्य, पर्यटनलगायत विकास निर्माणका पूर्वाधारलाई उनले एजेन्डा बनाएका छन् । जलविद्युत्को क्षेत्रमा लगानी गरी भोजपुरका टोल–टोलमा बिजुली पुर्याउने उनको भनाइ छ ।
अजम्बरले पहिचानको मुद्दालाई जोड दिएका छन् । भाषा, संस्कृति संरक्षणको जिम्मेवारी आफ्नै भएको उल्लेख गर्दै उनले आफू पहिचानवादीका रूपमा परिचित हुन चाहेको बताए ।
प्रतिक्रिया दिनुहोस !
