भारतले गर्यो लडाकु जहाजबाट ‘ब्रह्मोस’ मिसाइलको सफल परीक्षण
नयाँ दिल्ली : भारतले सुपरसोनिक क्रुज मिसाइल ब्रह्मोसलाई लडाकु जहाजबाट प्रहारको परीक्षण सफलतापूर्वक गरेको छ । भारतले बुधबार सुखोई लडाकु जहाजबाट ब्रह्मोसको सफल परीक्षण प्रहार गरेको हो ।
भारत र रसियाले संयुक्त रुपमा निर्माण गरेको ब्रह्मोस मिसाइलको यसअघि स्थल र जलमा सफल परीक्षण गरिसकिएको छ । अहिले भने आकासमा गरिएको यसको परीक्षण पनि सफल भएको भारतीय सञ्चारमाध्यमले जनाएका छन् । ब्रह्मोसको लडाकु जहाजबाट प्रहार गर्ने परीक्षण पनि सफल भएपछि भारतसँग पनि अब ‘ट्रायड’ मिसाइल अर्थात स्थल, जल र आकासबाट प्रहार गर्न सकिने मिसाइल उपलब्ध भएको छ ।
यसअघि अमेरिका, रुस र सीमित रुपमा फ्रान्ससँग मात्र यस्ता क्षमताका ट्रायड मिसाइल छन् । भारतीय सञ्चारमाध्यमले ब्रह्मोस अहिले विश्वको सबैभन्दा तीव्र गतिको सुपरसोनिक मिसाइल भएको दाबी गरेका छन्, जसको गति २.८ म्याक अर्थात् ध्वनीको गति बराबर छ । यो मिसाइलको प्रहार क्षमता २ सय ९० किलोमिटर छ र यसले ३ सय किलोग्रामसम्म युद्ध सामग्री बोक्न सक्छ । ब्रह्मोसजस्तो ट्रायड मिसाइल भारतका छिमेकी चीन र पाकिस्तानसँग समेत नभएको भारतीय सञ्चारमाध्यमले उल्लेख गरेका छन् ।
प्रतिक्रिया दिनुहोस !
