चीनले बन्द गर्‍यो उत्तर कोरिया जाने बाटो

बेइजिङ : चीनले उत्तर कोरियासँग जोडिएको प्रमुख सडक बन्द गरेको छ । चिनियाँ अधिकारीले शुक्रबार यस्तो जानकारी दिएका छन् ।संयुक्त राष्ट्रसंघ लगायतका अन्तर्राष्ट्रिय संघसंस्थाले उत्तर कोरियाविरुद्ध कठोर नाकाबन्दी लगाइरहेका बेला चालिएको यस्तो कदमले उत्तर कोरियालाई थप दबाब पर्ने भएको छ । हुनत चीनले यो अस्थायी भएको जानकारी दिएको छ ।

दुई देशलाई सडक मार्गले जोड्ने पुल बन्द गरिएको छ । उत्तर कोरियामाथि दबाब दिन अमेरिकी नेतृत्वको पश्चिमा शक्तिले चीनलाई लामो समयदेखि दबाब दिँदै आएको छ । उक्त पुल पुनः खोलिने मिति बताउन चीनले आनाकानी गरेको छ । चीनको मौनताले परमाणु परीक्षणलाई रोक्न यस्तो कदम चालिएको अनुमान गरिन थालेको छ । गत मंगलबार मात्रै एयर चाइनाले उत्तर कोरिया जाने सबै उडान बन्द गरेको थियो । केही समयअघि उत्तर कोरियाबाट आयात हुने तयारी कपडाको आयात पनि चीनले बन्द गरेको थियो । उसले उत्तरका लागि आवश्यक कोइलाको निर्यात पनि घटाएको थियो ।

चिनियाँ विदेश मन्त्रालयका प्रवक्ता कङ सुआङले भने ‘यालु नदीमा बनाइएको चीन–उत्तर कोरिया मैत्री पुल बन्द गरिएको छ । कङले भने, ‘मर्मतको कमका लागि उक्त पुल बन्द गरिएको छ ।’ उक्त पुल पुनः सुचारु हुने मिति भने उनले बताउन चाहेनन् । चीन उत्तर कोरियाको एकमात्र सहयोगी हो । प्योङयाङद्वारा लगातार क्षेप्यास्त्र परीक्षण हुन थालेपछि चीन पनि ऊसँग केही असन्तुष्ट देखिन थालेको छ ।