इस्लामाबादमा भिडन्त, १४१ घाइते

इस्लामाबाद : पाकिस्तानको राजधानी इस्लामाबादम प्रदर्शनकारी र सुरक्षाकर्मीबीच भएको भिडन्तमा १४१ जना घाइते भएका छन्।इस्लामाबादको नजिकै फैजाबाद इन्टरचेन्जमा इस्लामिक संगठन तहरिक-ए-लब्बैक (टीएलपी) र सुन्नी तहरीकले विगत २० दिनदेखि प्रदर्शन गर्दै आएका थिए। उनीहरूको धर्ना र प्रदर्शन असफल बनाउन शनिबार बिहानै सुरक्षाकर्मीले कारबाही शुरु गरेको थियो।

पाकिस्तान सुरक्षाबलले धर्ना बसेका प्रदर्शनकारीलाई तितरबितर गर्न बल प्रयोग गरेको थियो। त्यसको प्रतिकारमा प्रदर्शनकारीले ढुंगामुढा प्रहार गर्न शुरु गरेका थिए। फैजाबादमा भएको भिडन्तले राजधानी सहर इस्लामाबादसँगको सम्पर्कविच्छेद भएको थियो।

प्रदर्शनकारीले लुकेर सुरक्षाकर्मीमाथि अझै आक्रमण जारी राखेका छन्। सुरक्षाकर्मीले उनीहरूलाई नियन्त्रणमा लिन प्रयास गरिरहेका छन्। यसैबीच पाकिस्तान सरकारले उक्त भिडन्तको प्रत्यक्ष प्रसारण गर्न अनुरोध गरेको छ। अधिकांश टेलिभिजनले उक्त आदेश पालना गरेका छन्।

शनिवार एकाबिहानै प्रहरी र अर्धसैनिक बलका साढे आठ हजार जवानले धर्नामा बसेका २ हजार प्रदर्शनकारीलाई बल प्रयोग गर्दै लखेट्न शुरु गरेका थिए। त्यसको विरोधमा प्रदर्शनकारीले पनि सडक र बजार बन्द गरेका थिए। उक्त धर्ना ६ नोभेम्बरमा इस्लामिक संगठन टीएलपीले शुरु गरेको थियो। प्रदर्शनकारीले प्रमुख सडकहरू बन्द गरेका छन्। बाटोमा हजारौं मानिस अलपत्र परेका छन्। टीएलपी कार्यकर्ताले संघीय एवं प्रान्तीय कानुनमन्त्री जाहिद हमीद तथा राणा सनाउल्लाहका विरुद्ध प्रदर्शन गरिरहेका छन्।

सुरक्षाकर्मीले केही प्रदर्शनकारीलाई हिरासतमा लिएको प्रत्यक्षदर्शीले जानकारी दिएका छन्। ठाउँठाउँमा एम्बुलेन्स तैनाथ गरिएका छन्। घाइतेको विस्तृत विवरण आउन बाँकी रहेको प्रहरीले बताएको छ। उक्त धर्नाको विरोधमा सरकारले कुनै कारबाही नगरेको भन्दै पाकिस्तानको सर्वोच्च अदालत तथा इस इस्लामाबाद उच्च अदालतले आलोचना गर्दै बाटो खुलाउन आदेश दिएका थिए। थिए।