८-० को नतिजासहित बार्सिलोना अन्तिम १६ मा

नोउ क्याम्प : बार्सिलोना स्पेनिस कोपा डेल रे फुटबलको अन्तिम १६ मा प्रवेश गरेको छ । बुधबार राति भएको दोस्रो लेगको खेलमा रियल मुर्सियालाई ५-० गोलले पराजित गर्दै समग्रमा ८-० को नतिजासहित बार्सिलोनाले अन्तिम १६ मा स्थान बनाएको हो ।

घरेलु मैदानमा भएको खेलमा बार्सिलोनाका लागि फ्रान्सिस्को अलकासर, जेरार्ड पिके, एलिक्स भिडाल, डेनिस स्वारेज र जोसे अर्जनाइजले एकएक गोल गरे । बार्सिलोनाले मुर्सियाविरुद्ध पहिलो रोजाइका खेलाडीलाई आराम दिएर दोस्रो रोजाइका खेलाडी मैदान उतारेको थियो । पहिलो हाफको १६औं मिनेटमा फ्रान्सिस्कोले गोल गर्दै बार्सिलोनालाई सुरुआती अग्रता दिलाएका थिए ।

पहिलो हाफमा १-० ले अगाडि रहेको बार्सिलोनाले दोस्रो हाफमा चार गोल गरेको थियो । खेलको ५६औं मिनेटमा पिकेले गोल गर्दै बार्सिलोनाको अग्रता दोब्बर बनाएका थिए । त्यसपछि ५९औं मिनेटमा भिडाल, ७३औं मिनेटमा स्वारेज र ७८औं मिनेटमा जोसेले गोल गर्दै बार्सिलोनालाई ५-० को सहज जित दिलाएका थिए । बार्सिलोनाले मुर्सियाको घरेलु मैदानमा भएको पहिलो लेगको खेलमा ३-० को जित निकालेको थियो ।

प्रतियोगिताको अन्य खेलमा एट्लेटिको म्याड्रिडले एल्चेलाई ४-१ तथा सेभिल्लाले कार्टागेनालाई ७-० गोलले हराउँदै अन्तिम १६ मा स्थान बनाएका छन् । एथलेटिको बिल्बाओ र रियल सोसिडाड भने प्रतियोगिताबाट बाहिरिएका छन् । एथलेटिको बिल्बाओलाई फोर्मेटेराले २-१ तथा सोसिडाडलाई स्पोर्टिओले ३-२ गोलले पराजित गरे ।