यस्तो छ मतगणनाको तयारी (फोटोफिचर)

धादिङ : धादिङमा मंसिर १० गते सम्पन्न प्रतिनिधिसभा र प्रदेशसभा सदस्य चुनावको मतगणनाको तयारी पूरा भएको छ । ४५ जिल्लामा दोस्रो चरणको मतदानको तयारी भइराखेका बेला ३२ जिल्लामा भने मतगणना गर्ने तयारी भएको छ । दोस्रो चरणको निर्वाचन हुने ४५ को मतदान अवधि सकिए लत्तगै धादिङमा मतगणना सुरु गरिने मुख्य निर्वाचन अधिकृत उमेश कोइरालाले जानकारी दिए ।

दुई निर्वाचन क्षेत्र रहेको धादिङमा छुट्टाछुट्टै स्थानबाट एकसाथ मतगणना गर्ने तयारी भएको छ । स्थानीय तहको मतगणनाका क्रममा चितवनमा मतपत्र च्यातिएपछि त्यसैको प्रभावस्वरुप मतगणनास्थलमा फलामेतारजाली पनि लगाइएको छ । तारजाली बाहिर राजनीतिक दलका प्रतिनिधि, पत्रकार र पर्यवेक्षकका लागि बस्ने व्यवस्था मिलाइएको छ भने भित्र मतगणकमात्र बस्न पाउने छन्।

निर्वाचन आयोगले पठाएको निर्देशिका अनुसार प्रतिनिधिसभा र प्रदेशसभाको मतगणना एकसाथ गर्ने गरी व्यवस्था मिलाइएको जिल्ला निर्वाचन अधिकारी ईश्वर सिंखडाले जानकारी दिए । मतगणनाको सम्पूर्ण तयारी पूरा भएको र मतगणनास्थलमा तीनवटै सुरक्षा निकायका सुरक्षाकर्मी परिचालन हुने गरी सुरक्षा व्यवस्था मिलाइएको प्रमुख जिल्ला अधिकारी श्यामप्रसाद भण्डारीले जानकारी दिए ।

निर्वाचन क्षेत्र १ को मतगणना जिल्ला भूसंरक्षण कार्यलय र क्षेत्र २ को मतगणना जिल्ला समन्वय समितिको सभाहलमा हुँदै छ । दुई प्रतिनिधिसभा र चार प्रदेशसभाका लागि धादिङमा १७ उम्मेदवार चुनावी मैदानमा छन्।