धादिङ क्षेत्र २ प्रदेशसभा ख मा जगत सिम्खडा र क्षेत्र १ क मा राजेन्द्र पाण्डे विजयी
धादिङ : प्रदेशसभा तथा प्रतिनिधिसभाको निर्वाचन अन्तरगत धादिङको क्षेत्र २ को प्रदेशसभा ख मा नेकपा माओवादी केन्द्रका उम्मेद्वार जगत सिम्खडा विजयी भएका छन् ।
वाम गठबन्धन अन्तरगत माओवादी केन्द्रका जगतले १७ हजार ६ सय ५ मत ल्याएर विजयी भएका हुन् भने उनका प्रतिस्पर्धीमा लोकतान्त्रिक गठबन्धन अन्तरगत राप्रपाका डम्बर तामाङले १५ हजार ७ सय ७४ मत ल्याएका छन् ।
तामाङको भन्दा सिम्खडाले १८ सय ३१ मत बढी ल्याएका छन् भने उनको क्षेत्रमा २२ सय २८ मत बदर भएको थियो । प्रदेशसभा क्षेत्र १ र प्रतिनिधिसभाको भने मतगणना जारी रहेको छ ।
त्यस्तै क्षेत्र नं १ अन्तरगत प्रदेश सभा क मा पनि वाम गठबन्धन अन्तगरत नेकपा एमालेका उम्मेद्वार राजेन्द्र पाण्डे विजयी भएका छन् । आफ्ना प्रतिस्पर्धी नेपाली कांग्रेसका उम्मेद्वार मधुकुमार श्रेष्ठलाई १३ हजार ६ सय ९६ मतले पराजित गर्दै पाण्डे विजयी भएका हुन् । पाण्डेले २७ हजार ३ सय ३१ मत ल्याएका थिए भने श्रेष्ठले १३ हजार ६ सय ३५ मत पाएका छन् ।
पछिल्लो प्राप्त मतपरिणाम अनुसार धादिङको २ वटा प्रतिनिधिसभा र बाँकी २ वटा प्रदेश सभामा बाम गठबन्धनका उम्मेद्वार अगाडी छन् । नेकपा एमाले र माओवादी केन्द्रको बाम गठबन्धन तथा नेपाली कांग्रेस र राप्रपाको लोकतान्त्रिक गठबन्धनबीच तीव्र प्रतिस्पर्धा हुने अनुमान गरिएको निर्वाचनमा वाम गठबन्धन सहज रुपमा अगाडि देखिएको छ ।