मोरङका सबै क्षेत्रको नतिजा सार्वजनिक : एक कांग्रेस बाँकी सबै वाम
विराटनगर : मोरङका सबै क्षेत्रका प्रतिनिधि सभा सदस्यको अन्तिम नतिजा सार्वजनिक भएको छ। पछिल्लो पटक सार्वजनिक भएको मोरङ क्षेत्र नम्बर ५ मा माओवादी नेता शिवकुमार मण्डल विजयी बनेका छन्। मण्डलले २२ हजार ९ सय ४५ मत प्राप्त गरे भने कांग्रेसका अमृत अर्यालले १९ हजार १ सय ५३ मत प्राप्त गरे।
कांग्रेसले ६ क्षेत्र मध्ये एक स्थानमा मात्र जीत निकाल्न सक्यो। क्षेत्र नम्बर २ मा कांग्रेसका मिनेन्द्र रिजालले एमालेका ऋषिकेश पोख्रेललाई पराजित गरे। त्यस्तै मोरङ १ मा एमालेका घनश्याम खतिवडाले कांग्रेस जिल्ला सभापति समेत रहेका डिगबहादुर लिम्बुलाई पराजित गरे भने क्षेत्र ३ मा एमाले नेता भानुुभक्त ढकालले कांग्रेस उम्मेदवार सुनिलकुमार शर्मालाई पराजित भए।
त्यस्तै मोरङ ४ मा माओवादीका अमनलाल मोदीले कांग्रेसका प्रभावशाली नेता महेश आचार्यलाई फराकिलो मत अन्तरले पराजित गरे। कुल ६ लाख ४४ हजार ७ सय ८२ मतदाता रहेको जिल्लामा ४ लाख ६८ हजार ३ सय २७ मत खसेको थियो।
प्रतिनिधि सभा सदस्यको मत गणना सकिएको मोरङमा प्रदेश सभाका मत धमाधम गनिँदैछ। आइबार साँझसम्ममा प्रदेश सभाका सबै सिटको अन्तिम नजिता सार्वजनिक हुने मुख्य निर्वाचन अधिकृत राजुकुमार खतिवडाले जानकारी दिए।
प्रतिक्रिया दिनुहोस !
