मुगुमा वाम गठबन्धन विजयी

गमगढी : मंसिर १० गते सम्पन्न प्रतिनिधिसभा र प्रदेशसभा सदस्य निर्वाचनमा जिल्लाका तीन वटै क्षेत्रमा बाम गठबन्धनका उम्मेदवार विजयी भएका छन् ।
प्रतिनिधिसभा सदस्यका लागि बाम गठबन्धनका तर्फबाट एमाले उम्मेदवार गोपालबहादुर बम, प्रदेशसभा सदस्यका लागि निर्वाचन क्षेत्र क मा दानसिंह परियार र ख क्षेत्रमा चन्द्रबहादुर शाही विजयी भएको मुख्य निर्वाचन अधिकृत जवारप्रसाद सिंहले जानकारी दिए ।

शनिवार दिउँसो ३ बजे निर्वाचन मत गणनाको अन्तिम परिणाम सार्वजनिक भएको हो । मत परिणाम अनुसार बमले १३ हजार ३४ मत प्राप्त गरि विजयी बनेका हुन । उनका निकटतम प्रतिद्वन्द्वी नेपाली कांग्रेसका हस्तबहादुर मल्लले ९ हजार ८ सय ६१ मत प्राप्त गरेका थिए ।

त्यस्तै प्रदेश सभाका क मा बाम गठबन्धनका तर्फबाट एमालेका उम्मेदवार दानसिंह परियारले ५ हजार ६ सय ५३ मत प्राप्त गरि विजयी भएका छन भने उनका निकटतम प्रतिद्धन्द्धी नेपाली काँग्रेसका उम्मेदवार तिलकबहादुर मल्लले ५ हजार २ सय ९९ मत प्राप्त गरेका थिए । त्यस्तै प्रदेश सभाको ख मा सदस्य उम्मेदवार बनेका नेकपा एमालेका चन्द्रबहादुर शाहीले ६ हजार ८ सय ४५ मत प्राप्त गरि विजयी बनेका छन भने उनका निकटतम प्रतिद्वन्द्वी नेपाली कांग्रेसका खडगबहादुर शाहीले ४ हजार ६ सय ९ मत प्राप्त गरेका थिए ।

२०४८ सालको आम निर्वाचन र २०५१ को मध्यावधी निर्वाचनमा जित हासिल गरेको कांग्रेसले २०५४ सालको स्थानीय निर्वाचन देखि लगातार हार व्यहोर्दै आएको छ । २०५४ को स्थानीय निर्वाचनमा जिल्लाभर एमालेले विजय हासिल गरेको थियो भने २०५६ को संसदिय चुनावमा एमाले , २०६४ को संविधान सभामा नेकपा माओवादी र २०७० को संविधान सभाको निर्वाचनमा एमालेले नेपाली कांग्रेसलाई पराजित गरेका थिए । गत वैशाख ३१ गते सम्पन्न स्थानीय तहको निर्वाचनमा दुई गाउँपालिका र एक नगरपालिकामा कांग्रेसले जित हासिल गरेको थियो ।

प्रतिनीधी सभा र प्रदेश सभा सदस्यका लागि गरिएको प्रत्यक्ष तर्फको निर्वाचनको मतगणना सम्पन्न भएको र शनिवार साँझ देखि नै समानुपातिक तर्फ भएको निर्वाचनको मत गणना सुरु गरिने मुख्य निर्वाचन अधिकृतको कार्यालयले जानकारी दिएको छ ।