झापाका सबै क्षेत्रमा वामपन्थी उम्मेदवारको दबदबा, विश्वप्रकाश र सिटौला कमजोर

विर्तामोड : झापाका सबै निर्वाचन क्षेत्रमा वाम गठबन्धनका उम्मेदवारले आफ्नो बलियो उपस्थिति सावित गर्दै लगेका छन् । शनिबार राति भएको निर्वाचन क्षेत्र नं ४ को अन्तिम मत परिणामअनुसार प्रतिनिधिसभा सदस्य नेकपा एमालेका उम्मेदवार एलपी साँवा भारी मतले विजयी भएका छन् । उनले आफ्ना निकटतम प्रतिद्वन्द्वी कांग्रेसका उम्मेदवार देउकुमार थेबेलाई पराजित गरेका छन्।

त्यसका अतिरिक्त क्षेत्र नं १ मा पनि माओवादी केन्द्रका प्रतिनिधिसभा सदस्यका उम्मेदवार सुरेन्द्रकुमार कार्कीले मतान्तर फराकिलो बनाउँदै लगेका छन् । उनले अहिलेसम्म ३२ हजार ४ सय ८४ मत प्राप्त गरेका छन् । उनका निकटतम प्रतिस्पर्धी नेपाली कांग्रेसका विश्वप्रकाश शर्माले ३० हजार २ सय ५४ मत प्राप्त गरेका छन् । मतगणनाको सुरुआतदेखिनै अग्रता लिएका कार्कीले शर्मालाई अग्रता तोड्न दिएका छैनन् । मतगणनाको उत्तरार्धतिर आइपुग्न लाग्दा मतान्तर फराकिलो हुँदै गइरहेको छ ।

निर्वाचन क्षेत्र नं ३ मा नेपाली कांग्रेसका नेता कृष्णप्रसाद सिटौला लगभग पराजित हुने निश्चित भएको छ । उनका प्रतिस्पर्धी वाम गठबन्धन समर्थित राप्रपाका महामन्त्री राजेन्द्र लिङदेन निकै मतको अन्तरले अगाडि छन् । १ लाख १४ हजार ५ सय ८६ मतदाता रहेको झापा ३ मा ८२ हजार ९ सय २४ मत खसेको थियो ।

६२ हजार ५ सय ३८ मत गणना भइसक्दा राप्रपाका राजेन्द्र लिङदेनले ३३ हजार ६ सय ८७ मत प्राप्त गरेका छन् भने कांग्रेस नेता सिटौलाले २३ हजार ४ सय ९ मात्र मत प्राप्त गरेका छन् । अब २० हजार मत मात्र गणना गर्न बाँकी रहँदा सिटौला १० हजारभन्दा बढी मतान्तरले पछि परेकाले उनी पराजित हुने निश्चित भएको हो ।