डोटीको प्रदेशसभामा कांग्रेसका खड्का विजयी
डोटी: प्रदेशसभा निर्वाचन क्षेत्र १ (क) को मतगणना सकिएको छ। प्रदेशसभा निर्वाचन क्षेत्र १ (क) को मतपरिणाम अनुसार नेपाली कांग्रेसका उम्मेदवार भरतबहादुर खड्का विजयी भएका हुन्।
वामगठबन्धनको तर्फबाट नेकपा एमालेका जिल्ला अध्यक्ष चक्रबहादुर मल्ललाई ६१४ मत अन्तरले पराजित गर्दै खड्का विजयी भए। सुरुवातदेखि नै निकै कडा प्रतिस्पर्धा भएको यहाँ कांग्रेसका खड्काले १७४०६ मत ल्याएका छन् भने उनका निकटतम प्रतिद्वन्द्वी वामगठबन्धनका उम्मेदवार मल्लले १६७९२ मत प्राप्त गरेका छन्।
विजयी घोषणा भएपछि खड्काले संविधान कार्यान्वयनका लागि अगाडि बढ्ने बताए। ‘कांग्रेसको नेतृत्वमा संविधान निर्माण हुँदै सफल रुपमा स्थानीय, प्रतिनिधिसभा र प्रदेशसभाको निर्वाचन सम्पन्न गरेको छ', उनले भने, ‘अब संविधान कार्यान्वयनमासमेत कांग्रेसले महत्वपूर्ण भूमिका निर्वाह गर्ने छ।'
दुवै उम्मेदवार पहिलो पटक चुनावी मैदानमा उत्रिएका हुन्। विजयी भएका खड्का डोटीका जिल्ला विकास समितिका पूर्वसभापति हुन् भने मल्ल नेकपा एमालेका जिल्ला अध्यक्ष हुन्।
प्रतिक्रिया दिनुहोस !
