नुवाकोटका सबै क्षेत्रमा वाम, महत र केसी परिवारको विरासतमा धक्का

नुवाकोट : संविधानसभाबाट संविधान निर्माणपछि पहिलो पटक भएको प्रतिनिधिसभा र प्रदेशसभा निर्वाचनमा नुवाकोटबाट नेपाली कांग्रेसका दुई पुराना र प्रभावशाली नेताहरु डा.रामशरण महत र अर्जुननरसिंह केसी पराजित भएका छन्। केसीका भाई र डा. महतका भतिजसमेत प्रदेशसभामा पराजित भएका छन् ।

नुवाकोटमा पहिलो पटक सबै क्षेत्रमा कम्युनिस्टले कब्जा जमाएको छ । नुवाकोट क्षेत्र नं. १ मा माओवादी केन्द्रका नेता तथा पूर्व युवा तथा खेलकूदमन्त्री हितबहादुर तामाङ ३६४७३ मत प्राप्त गरी विजयी भएका छन् । उनले कांग्रेस नेता डा.रामशरण महतलाई ८५५३ मतान्तरले पराजित गरेका हुन्।

नुवाकोट क्षेत्र नं. १ मा ६९६९८ मत खसेकोमा सदर ६६०२८ मत गणना हुँदा तामाङका निकटतम प्रतिद्वन्दी पूर्वअर्थमन्त्री डा. महतले २७९२० मत प्राप्त गरेको निर्वाचन अधिकृत गोपाल लामिछानेले जानकारी दिए । गत २०५१ सालको मध्यावधि निर्वाचनदेखि लगातार सबै चुनाव जित्दै आएका डा.महतको विजय यात्रालाई हितबहादुरले रोकिदिएका हुन् ।

यसअघि पहिलो संविधानसभा २०६४ र दोश्रो संविधान सभा २०७० मा महतसँग हितबहादुर तामाङ पराजित भएका थिए । तेस्रो पटकमा तामाङले डा. महतको विजय यात्रा रोक्दै आफूलाई ह्याट्रिक पराजय हुनबाट जोगाएका छन् । रामशरण महत २०४८ सालको आम निर्वाचनमा नुवाकोट क्षेत्र नं. १ मा राप्रपाका डा. प्रकाशचन्द्र लोहनीसँग पराजित भएका थिए । २०५१ सालको मध्यावधि निर्वाचनमा क्षेत्र परिवर्तन गरेर उम्मेदवार वनेका डा. रामशरण महत त्यसपछि लगातार नुवाकोट क्षेत्र नं. २ को नेतृत्व गर्दै पटक÷पटक अर्थमन्त्री भइसकेका छन् । डा. महतले २०५१, २०५६, २०६४ र २०७० को निर्वाचन क्षेत्र नं. २ बाटै जितेका हुन् । डा. महत नेपाली कांग्रेसका आर्थिक नीतिका योजनाकारसमेत हुन् ।

सदरमुकाम विदुरसहित रहेको क्षेत्र नं. २ मा एमाले नुवाकोटका अध्यक्षससमेत रहेका नारायणप्रसाद खतिवडाले कांग्रेसका हस्ती अजुर्ननरसिंह केसीलाई १०५५७ मतान्तरले पराजित गरे। सदर मत ६५०५७ मध्ये खतिवडाले ३६८९२ मत पाए भने उनका निकटतम् प्रतिद्वन्दी केसीले २६३३८ मत पाए । विजयी खतिवडा २०७० सालको दोश्रो संविधानसभा निर्वाचनमा नुवाकोट क्षेत्र नं. ३ मा निकटतम प्रतिद्वन्दी थिए।

क्षेत्र नं. २ मा पराजित अर्जुननरसिंह केसीे २०४८ सालको आम निर्वाचनमा नुवाकोट क्षेत्र नं. ३ बाट विजयी भएका थिए । २०५१ सालको मध्यावधि निर्वाचनमा पनि सोही क्षेत्रबाट एमालेका महेन्द्रबहादुर पाण्डेलाई दोश्रो पटक पराजित गरेका थिए ।२०५६ सालको आम निर्वाचनमा एमालेका महेन्द्रबहादुर पाण्डेसँग केसी पहिलो पटक हारेका थिए । २०६४ सालको पहिलो संविधानसभा निर्वाचनमा क्षेत्र परिवर्तन गरेर क्षेत्र नं. १ मा उठेका केसी माओवादी केन्द्रकी विमला सुवेदीसँग पराजित भएका थिए ।

२०७० सालको दोश्रो संविधानसभा निर्वाचनमा उनै विमला सुवेदीलाई पारजत गरी जित हात पारेका थिए । केसी लामो समय पार्टी प्रवक्ता बने, बहुदल आएपछि उनी २०५२ सालमा स्वास्थ्य तथा आवास र २०५५ सालमा शिक्षामन्त्री भए । कांग्रेस नेता केसी पुष्पकमल दाहालको दोश्रो सरकारमा २०७३ साल साउनदेखि नौ महिनासम्म शहरी विकासमन्त्री भएका थिए ।

परिवार पनि पराजित

नुवाकोटमा महत र केसी परिवारको लामो समयदेखिको प्रभाव यसपटक वामपन्थी गठबन्धनले ध्वस्त बनाइदिएको छ । निर्वाचनमा प्रदेशसभामा पनि डा. महतका भतिज रमेशकुमार महत नुवाकोट १ को (क) र केसीका भाइ जगदीश्वरनरसिंह केसी नुवाकोट २ को (क)बाट पराजित भएका छन् ।

नुवाकोट-१ को प्रदेशसभा क मा माओवादी केन्द्रकी नेतृ तथा पुर्व कृषि राज्यमन्त्री राधिका तामाङ १८ हजार १ सय ३७ मत प्राप्त गरी बिजयी भएकी छन् । उनका निकटतम प्रतिस्पर्धी कांग्रेसका जिल्ला कोषाध्यक्ष महेन्द्र थिङले १३ हजार ३ सय ६८ मत प्राप्त गरेका छन् । प्रदेशसभा (ख) मा एमालेका जिल्ला उपाध्यक्ष बद्री मैनाली २० हजार ५ सय ९ मत प्राप्त गरी बिजयी भएका छन् । उनले कांग्रेसका महासमिति सदस्य रमेशकुमार महतलाई ८ हजारको मतान्तरमा पराजित गरेका हुन् । महतले १२ हजार २ सय १७ मत प्राप्त गरे । रमेशकुमार कांग्रेस नेताद्वय डा. रामशरण र उनका भाई डा. प्रकाशशरण महतका भतिजा हुन् ।

यता, नुवाकोट-२ को प्रदेशसभा (क) बाट एमालेका विदेश विभाग सदस्य केशवराज पाण्डे २० हजार ९ मत प्राप्त गरी बिजयी भएका छन् । उनका निकटतम प्रतिस्पर्धी जगदीश्वरनरसिंह केसीले १२ हजार ७ सय २९ मत प्राप्त गरेका हुन् । प्रदेशसभा ख बाट माओवादीका जिल्ला संयोजक हिरानाथ खतिवडा १७ हजार ६२ मत प्राप्त गरि बिजयी भएका छन् । उनका निकटतम प्रतिस्पर्धी कांग्रेसका जगतवहादुर तामाङले १४ हजार ३ मत पाएका छन् ।

लामो समयदेखि नुवाकोट १ मा राजनीति गतिविधि गर्दै आएका कांग्रेस केन्द्रीय सदस्य तथा पूर्वमन्त्री डा. प्रकाशशरण महत यस निर्वाचनमा गृह जिल्ला छाडेर काठमाडौबाट प्रतिनिधिसभा सदस्य उम्मेदवार बनेका थिए । उनी एमालेका इश्वर पोखरेलसँग पराजित भए ।