धनुषा प्रतिनिधिसभा २ मा फोरम र ४ मा वाम गठबन्धनकोे जित

जनकपुरधाम : प्रतिनीधिसभा अन्तर्गत धनुषा निर्वाचन क्षेत्र नम्बर २ मा संघीय समाजवादी फोरम नेपाल र ४ मा वाम गठबन्धनको जित भएको छ।

धनुषा २ मा फोरमका उमाशंकर अरगरियाले ३२ हजार ४४ मत ल्याएर जित हात पारेका छन्। उनका निकटतम प्रतिद्वन्द्वी वाम गठबन्धनका उम्मेदवार रामचन्द्र झाले १८ हजार ७ सय १५ मत प्राप्त गरेका हुन् भने नेपाली कांग्रेसका रामकृष्ण यादवले १५ हजार ४ सय ४२ मत पाएका हुन्।

२०५२ सालमा नेविसंघबाट राजनीतिक यात्रा सुरु गरेका अरगरिया विभिन्न पार्टी हुदैं संघीय समाजवादी फोरममा प्रवेश गरि चुनाव लडेका हुन्। प्रदेशसभा अन्तर्गत धनुषा निर्वाचन क्षेत्र नम्बर ख मा फोरम नेपालकै उम्मेदवार समाजसेवी रामअशिष यादव विजयी भएका हुन्।

यादवले १७ हजार १ सय ३१ मत प्राप्त गरेका हुन्। उनका निकटतम प्रतिद्वन्द्वी एमालेका उम्मेदवार रामचन्द्र मण्डलले ७ हजार १ सय ६२ मत पाएका हुन्। प्रदेशसभामा विजयी भएका यादव नेपाल पत्रकार महासंघ धनुषा शाखाका पूर्व अध्यक्ष समेत हुन्। उनी यस क्षेत्रमा गंगा सागर पोखरी सरसफाइका अभियन्ता र गंगा आरतीको प्रारम्भकर्ताको रुपमा निकै चर्चित छन्।

यसै क्रममा धनुषा क्षेत्र नम्बर चारमा वाम गठबन्धनका उम्मेदवार रघुवीर महासेठ विजयी भएका छन्। उनले २२ हजार ५ सय ३२ मत पाएका हुन्। उनका प्रतिस्पर्धी नेपाली कांग्रेसका महेन्द्र यादवले १९ हजार ९ सय ९१ मत ल्याएका हुन् भने संघीय समाजवादी फोरम नेपालका महाजन यादवले १९ हजार ६ सय ६२ मत ल्याएर तेस्रो भएका हुन्।

२०६४ सालमा संविधानसभाको निर्वाचनमा धनुषा क्षेत्र नम्बर ४ बाट पराजित महासेठ त्यसपछि धनुषा ५ मा भएको उपचुनावमा विजयी भएक थिए। २०७० सालको चुनावमा क्षेत्र नम्बर ५ बाटै उम्मेदवार बनेका महासेठ पुनः पराजित भएका थिए।