विजय भएपछि प्रमाणपत्र बुझ्न हेलिकोप्टर चार्टर गरेर जिल्लामा
गाईघाट : उदयपुर प्रतिनिधिसभा १ का नवनिर्वाचित सांसद नेपाली कांग्रेसका केन्द्रीय सदस्य डा. नारायण खड्का विजयी जुलुसमा सहभागी हुन् हेलिकोप्टर चार्टर गरेर गाईघाट आइपुगेका छन् ।
सामान्य विरामी परेपछि उपचारका लागि काठमाडौं पुगेका डा. खड्का सोमबार बिहान १०ः३० बजे हेलिकोप्टरबाट सदरमुकाम आइपुगेका हुन् । सोमबार बिहान ९ बजे निर्वाचित भएको जानकारी पाएपछि खड्का निर्वाचित भएको प्रमाणपत्र बुझ्न र विजयी जुलसमा सहभागी हुन् हेलिकोप्टर चार्टर गरेर आएका हुन् ।
आइतबार रातिसम्म प्रतिस्पर्धी वाम गठबन्धन एमालेका उम्मेदवार मन्जुकुमारी चौधरीसँग ३ सय ७ मतले पछि परेका खड्का सोमबार बिहान जित नजिक पुगेका थिए । खड्काले प्रतिस्पर्धी चौधरीलाई ५४८ मतले पछि पारेका थिए । खड्काले ३३ हजार १४२ र चौधरीले ३२ हजार ५९४ मत प्राप्त गरेका थिए ।
दुबै उमेदवार २०७० का निर्वाचित सांसद हुन् । यसअघि ३ वटा निर्वाचन क्षेत्र रहेको उदयपुरमा खड्काले क्षेत्र नम्बर १ र चौधरीले क्षेत्र नम्बर २ बाट विजयी भएका थिए । जितसँगै नेपाली कांग्रेसले सदरमुकाम गाईघाटलगायत पूर्वी क्षेत्रमा विजयी जुलुसको तयारी गरेको छ ।
कांग्रेसले प्रतिनिधिसभा १ अन्र्तगत रहेको प्रदेश २ मा पनि जितेको छ । सदरमुकाम रहेको यो प्रदेशमा कांग्रेसका पूर्वसभापति हिमाल कार्की विजयी भएका हुन् । कार्कीले गठबन्धन माओवादी केन्द्रका केन्द्रीय सदस्य तथा पूर्वसभाषद रामबहादुर मगरलाई १ हजार ५९८ मतले पराजित गरेका थिए । कार्कीले १६ हजार ७९२ र मगरले १५ हजार १९४ मत प्राप्त गरेका थिए ।
प्रतिक्रिया दिनुहोस !
