स्वाधीनता रक्षार्थ सदन र सडक संघर्ष : सुवाल

भक्तपुर : भक्तपुर निर्वाचन १ बाट प्रतिनिधिसभा सदस्यमा निर्वाचित नेपाल मजदुर किसान पार्टीका सचिव प्रेम सुवालले देशको स्वाधीनता र स्वतन्त्रता रक्षाको लागि सदनमा संघर्ष गर्ने बताएका छन् ।उनले सदनबाट मात्रै देशको स्वाधीनता र स्वतन्त्रता रक्षा नभए सडकमै ओर्लनेसमेत बताएका छन् ।
भक्तपुर क्षेत्र नं १ बाट प्रतिनिधिसभा निर्वाचित भएपछि सोमबार मत गणनास्थल खरिपाटीमा गरिएको मतदाताहरुलाई धन्यवाद ज्ञापन कार्यक्रममा उनले जनताले विश्वाससाथ दिएको मतलाई शिरोधार्य गर्दै काम गर्ने वचन दिए ।

‘हाम्रो जीत भक्तपुरका जनताको जीत हो, जनताले विश्वाससाथ दिएको मतलाई शिरोधार्य गर्दै काम गर्नेर्छौं’, नवनिर्वाचित उम्मेदवार सुवालले भने, ‘देशको स्वाधीनता र स्वतन्त्रता रक्षाको लागि हामी सदनमा संघर्ष गर्नेछौं । सदनबाट नभएर सडक संघर्षसम्म उत्रन्छौं ।’

नेता सुवालले देशमै पर्याप्त रोजगारी सिर्जना गरी युवाहरुलाई विदेसिन नदिने नीति निर्माण गर्न आफूहरुले संघर्ष गर्ने प्रतिबद्धता व्यक्त गरे ।
त्यस्तै भक्तपुर क्षेत्र नं १ प्रदेश ‘ख’ मा विजयी नेमकिपाका उम्मेदवार सुरेन्द्रराज गोसाईंले पार्टीको घोषणापत्रअनुसार निःशुल्क शिक्षा र स्वास्थ्यसँगै योग्यताअनुसारको काम र कामअनुसारको ज्यालाको बन्दोबस्त गर्ने नीतिको लागि संघर्ष गर्ने प्रतिबद्धता व्यक्त गरे ।

करिब दोब्बर मतले सुवाल विजयी

भक्तपुर क्षेत्र नं १ मा नेमकिपाका उम्मेदवार सुवाल प्रतिद्वन्द्वीभन्दा करिब दोब्बर मतसहित विजयी भएका हुन् । उनले ३३ हजार ७६ मत ल्याएर जीत दर्ता गर्दा प्रतिद्वन्द्वी नेपाली कांग्रेसका बाबुराजा जोशीले १७ हजार आठ सय १८ मत ल्याए ।
भक्तपुर क्षेत्र नं २ को प्रतिनिधिसभामा जीत हात पारेको वाम गठबन्धनले क्षेत्र नं १ मा तेस्रो स्थानमै चित्त बुझाउन प¥यो । वाम गठबन्धनका लागि माओवादी केन्द्रका मिलन सुवालले १५ हजार तीन सय ७४ मत पाए ।
भक्तपुर क्षेत्र नं १ मा कूल ९४ हजार एकसय ६४ मतदातामध्ये ७६.८१ प्रतिशत अर्थात ७२ हजार एकसय ६८ मत खसेको थियो । ७० हजार चार सय ६५ मत सदर हुँदा एक हजार सातसय तीन मत बदर भएको भक्तपुरका मुख्य निर्वाचन अधिकृत भोजराज शर्माले जानकारी दिए ।

प्रदेश ‘क’ मा वाम विजयी

त्यस्तै क्षेत्र नं १ को प्रदेश ‘क’ मा भने वाम गठबन्धनका लागि एमालेका हरिशरण लामिछानेले जीतको झण्डा गाडेका छन् । उनले १२ हजार सात सय ८९ मत ल्याएर विजयी भएका हुन् ।
लामिछानेले वाम गठबन्धनको आधिकारिक उम्मेदवारविरुद्ध वागी उम्मेदवारी दिएका थिए । पछि नेकपा एमाले र माओवादी केन्द्रले केन्द्रीय तहमै सहमति गरेर लामिछानेको उम्मेदवारीलाई गठबन्धनको आधिकारिक उम्मेदवारीको मान्यता दिइएको थियो ।
उनका निकटतम प्रतिद्वन्द्वी नेपाली कांग्रेसका जीवन खत्रीले नौ हजार नौ सय ७७ मत ल्याए । त्यस्तै सात हजार १९ मत ल्याएर नेमकिपाका निरज लवजू तेस्रो स्थानमै सीमित रहे ।
यस प्रदेशमा कूल ४३ हजार पाँच सय ५२ मतदाता थिए । जसमध्ये ७५.२५ प्रतिशत अर्थात ३२ हजार आठ सय ३८ मत खसेको थियो ।

प्रदेश ‘ख’ मा भारी मतले नेमकिपाका गोसाई विजयी
यसै क्षेत्रको प्रदेश ‘ख’ मा भने नेमकिपाका उम्मेदवार सुरेन्द्रराज गोसाई भारी मतले विजयी भए । स्थानीय तह निर्वाचनमा नेमकिपाले क्लिन स्वीप गरेको भक्तपुर नगरपालिकाको वडा नं १ देखि ९ सम्मका वडाका मतदाताले मतदान गरेको यस प्रदेशमा विजयी गोसाईंले २३ हजार आठ सय ८५ मत ल्याए ।
उनका प्रतिद्वन्द्वी वाम गठबन्धनका लागि नेकपा एमालेका उम्मेदवार रोमन शिलाकार आठ हजार ६३ मतमा समेटिए । स्थानीय तह निर्वाचनमा दोस्रो भएको कांग्रेसका उम्मेदवार अनिल भुजू भने पाँच हजार चार सय ४७ मतका साथ तेस्रो स्थानमा रहे ।
यस प्रदेशमा ५० हजार ६ सय १२ मतदाता रहेका थिए । यहाँ ७७.३१ प्रतिशत अर्थात ३९ हजार दुई सय ४२ मत खसेको जिल्ला निर्वाचन कार्यालयले जनाएको छ ।

भक्तपुर क्षेत्र नं २ को प्रतिनिधिसभा र दुई प्रदेशसभामा भने वाम गठबन्धनको लागि नेकपा एमालेका तीनैजना उम्मेदवारहरु जितिसकेका छन् । यहाँ प्रतिनिधिसभातर्फ महेश बस्नेत र प्रदेश ‘क’ र ‘ख’ मा क्रमशः शशिजंग थापा र राजेन्द्रमान श्रेष्ठ विजयी भएका हुन् ।

कांग्रेस शून्य

भक्तपुर क्षेत्र नं १ र २ को अन्तिम परिणामसँग भक्तपुरमा नेपाली कांग्रेसको हातलागी शून्य भएको छ । २०७० सालको दोस्रो संविधानसभा निर्वाचनमा भक्तपुर क्षेत्र नं २ मा जीत हात पारेको कांग्रेसले यसपटक उक्त क्षेत्रबाट समेत हात धुनुपरेको हो । कांग्रेसले यस क्षेत्रमा पूर्वसभामुख दमननाथ ढुंगानाको उम्मेदवारी दर्ता गरेको थियो तर वाम गठबन्धनका उम्मेदवार पूर्वउद्योगमन्त्री बस्नेतसँग करिब दोब्बर मतले पराजित हुनुप¥यो ।