‘संविधान जीवित होस्'
काठमाडौं: प्रतिनिधिसभा र प्रदेशसभा चुनाव प्रचारक्रममा बम विस्फोटनमा परी शरीरको छाला जलेका र दुवै खुट्टा छियाछिया भएका कांग्रेस उम्मेदवार नारायणबहादुर कार्की (६७) ले आफैँलाई मतदान गर्न पाएनन् । उदयपुर २ बाट प्रतिनिधिसभामा उठेका उनी चुनावमा पराजित भए पनि निरास छैनन् । भेट्न आउने शुभेच्छुकलाई शिक्षण अस्पतालको शड्ढयाबाट कामना गर्दै भन्छन्, ‘लोकतन्त्रको संरक्षण होस् । संविधान दिगो बनोस् ।'
आफूलाई झन्डै १६ हजार मतदाताले भोट दिएकोमा उनी आभारी छन् । उनको क्षेत्रमा वाम गठबन्धनबाट माओवादीका उम्मेदवार सुरेश किराँती विजयी भएका छन् । कार्की भन्छन्, ‘लोकतन्त्रलाई मजबुत पार्ने काममा देशभरका सबै मतदाताले चासो दिनुपर्छ।'
गत मंसिर १३ गते उनलाई लक्ष्य गरी बम विस्फोटन गराइएको थियो । चुनावीसभालाई सम्बोधन गर्न जाँदै गर्दा उदयपुरको गढी गाउँपालिका–६ मा उनी सवार बोलेरो जिप विस्फोटनमा परेको थियो । उनको दुवै खुट्टा फ्याक्चर भएको छ । कुर्कुच्चाको हड्डी क्षतविक्षत छ । शरीरको छाला जलेको छ । खुट्टाको रगत बहने नसामै क्षति पुर्याएको छ । खुट्टामा स्टिल राखेर सहज बनाउने प्रयास चिकित्सकहरूले गरेका छन् । तिघ्राको मासु झिकेर हत्केलामाथिको भागमा टाँसिएको छ ।
चिकित्सकले करिब दुई महिना अस्पतालमै बस्नुपर्ने बताएका छन् । उनको हेरचाहका लागि परिवारका सदस्यका साथै शुभेच्छुकहरू अस्पताल आउने गरेका छन् । स्थानीय उदयपुरगढी माध्यमिक विद्यालयमा शिक्षक रहेका कार्की राजीनामा दिएर राजनीतिमा लागेका थिए । उनी २०७० सालको संविधानसभा निर्वाचनमा विजयी भएका थिए ।
कार्कीसँगै घाइते भएका उदय श्री बहुमुखी क्याम्पस कटारीकी नेविसंघ सभापति मीरा कटुवालले पनि मतदान गर्न पाइनन् । उनले बायाँ खुट्टा गुमाइन् । चुनावी मतगणना भइरहँदा उनले आँखा मोबाइलकोे अनलाइन न्युजतर्फ केन्द्रित भयो । समाचार हेर्न हातमा मोबाइल छुटेको छैन । २३ वर्षीया कटुवाल भन्छिन्, ‘बम विस्फोट गराउनेहरूलाई भन्ने कुनै शब्द नै छैन । जति भत्र्सना गरे पनि कम हुन्छ । लोकतन्त्र जीवित होस् भन्ने कामना छ । संविधान कार्यान्वयन होस् ।' अब कृत्रिम खुट्टाको सहारामा भए पनि राजनीतिमै समाहित हुने दृढतासमेत उनले व्यक्त गरिन् ।
प्रतिक्रिया दिनुहोस !
