मतदाता शिक्षाको धज्जी उडाउँदै बदर मत

विदुर: प्रतिनिधिसभा र प्रदेशसभामा बदर मत संख्याले नुवाकोट र रसुवामा सञ्चालित मतदाता शिक्षा कार्यक्रमको धज्जी उडाएको छ । बदर मत न्यून गर्न स्थानीयवासीलाई नै मतदाता शिक्षा स्वयंसेवकका रुपमा परिचालन गरिए पनि अत्यधिक बदर मतले मतदाता शिक्षाको प्रभावकारीता शून्यप्रायः भएको छ।

दुवै जिल्लामा प्रदेशसभा र प्रतिनिधिसभा निर्वाचनमा मतदाता शिक्षा प्रभावकारी नहुँदा नुवाकोट र रसुवामा धेरै मत बदर भएको सरोकारवालाले खुलासा गरेका छन् । प्रतिनिधिसभाका दुई र प्रदेशसभाका चार सिट रहेको नुवाकोटमा २ लाख ८ हजार १ सय ९१ मतदातामध्ये १ लाख ३९ हजार ७ सय ६१ मत खसेको थियो । प्रतिनिधिसभाका लागि नुवाकोटका दुवै निर्वाचन क्षेत्रमा ८ हजार ४ सय ४० मत बदर भए।

नुवाकोट १ मा कुल १ लाख ५ हजार २ सय ८७ मतदाता रहेकोमा ६९ हजार ८ सय ६४ मत खसेकोमा ५ दशमलव २५ प्रतिशत अर्थात ३ हजार ६ सय ७० मत बदर भएको निर्वाचन अधिकृतको कार्यालयका सूचना अधिकारी कृष्ण रिजालले बताए । नुवाकोट २ मा ६९ हजार ८ सय २७ मत खसेकोमा ६ दशमलव ८३ प्रतिशत अर्थात ४ हजार ७ सय ७० मत बदर भएको छ । समग्रमा नुवाकोटमा कुल खसेको मतको ६ प्रतिशत बदर भएको मुख्य निर्वाचन अधिकृतको कार्यालय नुवाकोटले जनाएको छ।

नुवाकोट १ को प्रदेशसभा ‘क' मा ५२ हजार १ मतदाता रहेकोमा ३३ हजार ९ सय ४२ मत खसेको थियो । खसेको मतमध्ये १ हजार ३ सय ४० मत बदर भएको रिजालले बताए । प्रदेशसभा ‘ख' मा ५३ हजार २ सय ८६ मतदाता रहेकोमा ३५ हजार ७ सय २६ मत खसेको थियो । त्यसमध्ये १ हजार ६ सय २७ मत बदर भएको उनले बताए । नुवाकोट २ को प्रदेशसभा ‘क' मा ३५ हजार ४ सय ७९ मत खसेकोमा १ हजार ४ सय ७८ मत र प्रदेशसभा ‘ख' मा ३४ हजार ३ सय मत खसेकोमा १ हजार ७८ मत बदर भएको मुख्य निर्वाचन अधिकृतको कार्यालयका सूचना अधिकारी यज्ञ पुरीले जानकारी दिए ।

नुवाकोटको छिमेकी रसुवामा ३२ हजार ३ सय २२ मतदाता रहेकोमा २६ हजार ९८ मत खसेकोमा १ हजार १ सय ४५ मत बदर भएको रसुवा निर्वाचन अधिकृतको कार्यालयले जनाएको छ । रसुवामा कुल खसेको मतको ४ दशमलव ३८ प्रतिशत मत बदर भएको हो ।

मतदाता शिक्षा प्रभावकारी नहुँदा धेरै मत बदर भएको राजनीतिक दलका प्रतिनिधिले बताएका छन् । बदर भएको मतले मतदाता शिक्षा कार्यक्रमको धज्जी उडाएको उनीहरू बताउँछन् । रसुवामासमेत सोही अनुपातमा मत बदर भएको छ ।

मतदाता शिक्षाका लागि निर्वाचन आयोगले खटाएका प्रतिनिधिले सही तरिकाले मतदान गर्न जानकारी गराउन नसक्दा बदर मत बढेको जिल्ला निर्वाचन अधिकारी जनार्दन अधिकारीले स्विकारे । मतदाता शिक्षा स्वंसेवक घरघरमै पुगेर शिक्षा प्रदान गर्नुपर्नेमा अधिकांश गाउँ, वडा र घरघरमा नपुगेको गुनासो आएको उनले बताए । मतदाताको घरदैलोमा पुगेर शिक्षा दिनुपर्ने स्वयंसेवकले पोस्टर टाँस्ने काम मात्रै गरेको मतदाताको गुनासो छ ।

धेरैले मतदान गर्ने तरिका र बदर हुने अवस्था जानकारी नभएको विदुर नगरपालिका–२ का बालमुकुन्द नेपालले बताए । एउटै मतपत्रमा धेरै स्वस्तिक छाप लगाइनुका साथै ल्याप्चे लगाएका मतपत्र धेरै पाइएको गणक कमलराज गैरेले बताए । गत वैशाख ३१ गते भएको स्थानीय तहको निर्वाचनमा पनि धेरै मत बदर भएको थियो । निर्वाचनमा खसेको १ लाख ३९ हजार ५ सय ९२ मतमध्ये ३ हजार ३ सय ७५ अर्थात् २ दशमलव ४१ प्रतिशत मत बदर भएको थियो । २५ हजार ८ सय ४७ मत खसेको विदुर नगरपालिकामा नै ३ सय ९० मत बदर भएको थियो ।

नुवाकोटमा धेरै चिह्नमा मतदान, उम्मेदवारको धेरै लाइनमा मतदान, खाली मत, ल्याप्चे लगाइएका, घेराभन्दा बाहिर मतदान गरिएका जस्ता कारणले धेरै मत बदर भएको हो । विगतभन्दा ल्याप्चे मतको संख्या भने घटेको छ ।

स्थानीय तहको निर्वाचनमा रसुवामा खसेको २२ हजार ४ सय ८९ मतमध्ये १३ दशमलव ५० प्रतिशत मत बदर भएको थियो ।