मतदाताको रोजाइ नयाँ अनुहार

तुलसीपुर : २०७० को संविधानसभा निर्वाचनमा जिल्लामा ५ निर्वाचन क्षेत्र थिए । सबै कांग्रेसले जित्यो । यस पटकको निर्वाचनमा र प्रदेशसभामा कांग्रेसबाट तीन जना प्रतिनिधि र दुई जना प्रदेशसभाका उम्मेदवार बने । तर, प्रदेशसभामा एक जनावाहेक कसैले चुनाव जित्न सकेनन् । ती सबै क्षेत्रमा कांग्रेस इतरका अन्य दलका नयाँ अनुहार निर्वाचित भए । प्रतिनिधि र प्रदेशसभाका नौ क्षेत्रमध्ये चार जना पूर्वसंसदले जिते भने भने पाँच जना विल्कुलै नयाँ अनुहारले अवसर पाए ।

प्रतिनिधिसभा क्षेत्र १ का मेटमणि चौधरी, प्रदेशसभा १ ‘ख' का रेवतीरमण शर्मा, प्रदेशसभा २ ‘ख' का अमरबहादुर डाँगी, क्षेत्र ३ का प्रतिनिधिसभा सदस्य हिराचन्द्र केसी, ३ ‘ख' का उत्तरकुमार ओली नयाँ अनुहार हुन् ।

प्रतिनिधिसभा क्षेत्र २ का कृष्णबहादुर महरा, २ ‘क' का शंकर पोखरेल, ३ ‘क' का डिल्लीबहादुर चौधरी, क्षेत्र नं १ ‘क' का इन्द्रजित चौधरीले भने विगतमा संसद्को अनुभव संगालिसकेका छन् । जिल्लाबाट विगतमा चुनाव जितेका अधिकांश व्यक्तिहरू प्रतिस्पर्धामा रहे पनि मतदाताको रोजाइ भने नयाँ अनुहार भएको पाइयो । उम्मेदवार भने स्थानीयका लागि चिरपरिचित नै थिए । प्रमुख दलका सबै उम्मेदवार विगतमा संविधानसभा र सांसदको अनुभव संगालेका थिए । तर, जनताले नयाँ अनुहारलाई सांसद बनाएका छन् ।

जिल्लाका मतदाताहरुले हरेक निर्वाचनमा नयाँ अनुहारलाई चुन्ने गरेको इतिहासलाई फेरि दोहोर्‍याएका छन् । ०४८ सालयताका संसदीय निर्वाचनलाई हेर्दा अपवाद बाहेक सबै नयाँ अनुहार चुनिने गरेका छन् । ०५१ को निर्वाचनमा जितेकाहरू ०५६ सालमा जित्न सकेनन् । ०५६ सालका विजेताहरू ०६४ मा पराजित भए । ०६४ मा जित्नेहरू ०७० दोहोरिएनन् । ०७० चुनाव जित्ने एक जना मात्र यसपटकको निर्वाचनमा दोहोरिए । यो शृंखलालाई हेर्दा नागरिकले नयाँ अनुहारलाई रोजेको र विश्वास गरेको देखिएको छ । नागरिकले व्यक्ति मात्रै होइन, पटक पटक पार्टीसमेत नयाँ र फरक खोज्दै आएको नागरिक समाज दाङका संयोजक टीकाराम रेग्मी बताउँछन् । ‘पूरानाले अपेक्षा अनुसारको भूमिका खेल्न नसकेकाले नयाँ विकल्प खोजेका हुन्', उनले भने ।

उनले जनताले सोचे अनुसार जनप्रतिनिधिहरु क्रियाशील नभएकाले नयाँ विकल्पको खोजी भएको हुनसक्ने उनको बुझाइ छ । भन्छन्, ‘नागरिकमा विकासको अपेक्षा बढेको र स्थायित्वको खोजीले पनि नयाँले अवसर पाएका हुन् ।'