सल्यानमा २०६४ देखि वामकै जित

दाङ : प्रतिनिधिसभा र प्रदेशसभा सदस्य निर्वाचनमा वाम गठबन्धनले सल्यानलाई क्लिन स्वीप गरेसंगै सल्यानमा वाम गठबन्धनको तर्फबाट उम्मेदवार बनेका माओवादी नेता तथा विना विभागीय मन्त्री टेक बहादुर बस्नेत र एमाले पोलिटब्यूरो सदस्य प्रकाश ज्वालाले जितमा ह्याट्रिक गरेका छन ।

माओवादी नेता बस्नेतले माओवादी शान्ति प्रक्रियामा आएदेखि भएका सबै निर्वाचनमा सल्यानबाट चुनाव जित्दै आएका छन । उनले २०६४ सालदेखि ७४ सालसम्मका तीनवटै निर्वाचनमा एकछत्र रुपमा चुनाव जितेर ह्याट्रिक गरेका हुन । दुबै संविधानसभाको निर्वाचनमा सल्यान क्षेत्र नं एकबाट निर्वाचित बस्नेत यस पटकको पनि प्रतिनिधिसभा सदस्यमा निर्वाचित भएका छन् । यस पटक सल्यानमा प्रतिनिधिसभाको एक मात्र निर्वाचन क्षेत्र रहेको छ ।

दुई वटा निर्वाचनमा एमालेलाई प्रतिद्वन्द्वी बनाएका बस्नेतले यसपटक भने वाम गठबन्धनका कारण कांग्रेस प्रतिद्वन्द्वी पाए । बस्नेत प्रतिनिधिसभा सदस्यमा सल्यानबाट ४० हजार ८ सय ९७ मत ल्याएर विजयी भएका छन । उनका निकटतम प्रतिद्वन्द्वी नेपाली कांग्रेसका राजेन्द्रबहादुर शाहले २९ हजार ७ सय ६७ मत ल्याए।

यस पटको निर्वाचनमा सल्यानमा प्रदेश सभाबाट विजयी भएका प्रकाश ज्वालाले पनि जितमा ह्याट्रिक गरेका छन । कांग्रेसको किल्ला तोडदै पहिलो पटक २०५६ सालको निर्वाचनमा चुनाव जितेका ज्वालाले २०७० सालको दोस्रो संविधानसभामा पनि सल्यान २ बाट निर्वाचित भएका थिए । अहिले पनि ज्वाला सल्यानको प्रदेशसभा ख बाट निर्वाचित भएका छन । उनलाई ६ नं प्रदेशको मुख्यमन्त्रीको रुपमा पनि हेरिएको छ ।

वाम गठबन्धनपछि संघ माओवादीलाई दिने सहमति भएर ज्वाला चुनाव लड्न प्रदेशमा आएका थिए । वामका दुई नेताले जितमा ह्याट्रिक गरे संगै सल्यानमा कम्युनिष्ट पार्टीले पनि ह्याट्रिक गरेको छ । ६४ पछिको निर्वाचनमा सल्यानमा संसदीय निर्वाचनमा कम्युनिष्ट पार्टीका उम्मेदवार मात्रै विजयी हुदैँ आएका छन।

सार्वजनिक मत परिणाम अनुसार ज्वालाले १९ हजार ८ सय ३६ मत ल्याएर विजयी भए । भने उनका निकटतम प्रतिस्पर्धी नेपाली काँग्रेसका डिल्ली रेग्मीले ११ हजार ६ सय ३० मत प्राप्त गरेका छन । त्यस्तै प्रदेश समा सदस्य (क)मा एमालेका वैकल्पीक केन्द्रिय सदस्य गुलाबजंग शाह निर्वाचित भएका छन ।