५ वटा प्रदेशमा एमाले, २ वटामा कांग्रेस

काठमाडौं : प्रतिनिधिसभा निर्वाचनको समानुपातिकतर्फको मतगणनामा पनि एमालेकै अग्रता देखिएको छ । वाम गठबन्धनका कारण प्रत्यक्षतर्फ राम्रो नजिता हासिल गरेको माओवादी समानुपातिकतर्फ भने तेस्रो स्थानमा छ । प्रत्यक्षतर्फ निकै खस्केको कांग्रेस समानुपातिकतर्फ भने दोस्रो स्थानमा छ । राति १० बजेसम्मको अवस्थामा एमालेले समानुपातिकर्फ १६ लाख ५ सय ३४ मत प्राप्त गरेको छ । निर्वाचन आयोगका अनुसार समानुपातिकतर्फ दोस्रो स्थानमा रहेको कांग्रेसले १५ लाख ६ हजार ५ सय ७८ मत हासिल गरेको छ । प्रत्यक्षतर्फ जम्मा २२ स्थानमा मात्र जित हात पारेको कांग्रेसले समानुपातिकतर्फको नजिताबाट क्षतिपूर्ति पाउने देखिएको छ ।

प्रत्यक्षतर्फ कांग्रेसभन्दा निकैमाथि रहेको माओवादीले समानुपातिकमा भने ६ लाख ३२ हजार ३ सय ३४ मत मात्र प्राप्त गरेको छ । माओवादी केन्द्रले समानुपातिकमा कम मत पाएका कारण कांग्रेस र उसको संसद्मा उस्ताउस्तै उपस्थिति हुने सम्भावना रहेको आयोग पदाधिकारीहरूको अनुमान छ । यद्यपि, सबै जिल्लाको समानुपातिकतर्फको नजिता भने टुंगिसकेको छैन । समानुपातिकतर्फ १ लाख ६० हजार ८ सय १४ मत ल्याएर संघीय फोरम चौथो स्थानमा छ भने राजपा १ लाख ३ हजार ३ सय ९२ मतका साथ पाँचौ स्थानमा छ । यी पाँचवटा दलले १ लाख भन्दा बढी मत पाइसकेका कारण ३ प्रतिशत मत कटाउने अनुमान गरिएको छ । समानुपातिकमा ३ प्रतिशत मत पाउनेले मात्र राष्ट्रिय दलको मान्यता पाउनेछन् ।

राप्रपाले पनि समानुपातिकतर्फ १ लाख मत कटाएको छ । विवेकशील साझा पनि १ लाख मतको नजिक छ । उसले ९६ हजार ७ सय १४ मत पाएको छ । नयाँ शक्ति, राप्रपा (प्रजातान्त्रिक) र जनमोर्चाले भने ५० हजार मत कटाउन सकेका छैनन् ।

यस्तै प्रदेशसभातर्फ पनि ५ वटामा एमाले र २ वटाको समानुपातिकतर्फ कांग्रेसको अग्रता छ । प्रदेश नम्बर १, ३, ४, ५ र ६ मा एमाले अघि छ भने प्रदेश २ र ७ मा कांग्रेस पहिलो स्थानमा छ ।

प्रदेश १ मा एमालेकै अग्रता देखिएको छ । एमालेले ३ लाख ६१ हजार ७ सय ७० मत पाएको छ भने कांग्रेसले ३ लाख २ हजार २३ मत ल्याएको छ । माओवादी केन्द्रले १ लाख २० हजार १ सय ५१ मत पाउँदा राप्रपाले २४ हजार ६ सय ९२ मत पाएको छ ।

प्रदेश २ मा भने एमाले चौथो स्थानमा छ । प्रदेश २ मा कांग्रेसले ८६ हजार ६ सय ३६, राजापाले ६४ हजार ९ सय २५ र संघीय फोरमले ५४ हजार ७ सय ३६ मत ल्याएको छ । एमालेले ५० हजार ६४ र माओवादीले ३० हजार ९ सय ३१ मत पाएको छ ।

प्रदेश ३ मा भने एमालेको अग्रता देखिएको छ । एमालेले २ लाख ९२ हजार ३ सय ३८ मत पाएको छ भने दोस्रो स्थानमा रहेको कांग्रेसले २ लाख ३३ हजार ४ सय ५४ मत पाएको छ । प्रदेश ३ मा तेस्रो स्थानमा रहेको माओवादीले १ लाख ४४ हजार ९ सय ११ मत पाएको छ । यो प्रदेशमा विवेकशील साझाले ५० हजार ८ सय ६६ मत पाएको छ ।

प्रदेश ४ मा पनि कांग्रेसभन्दा एमाले केही मतले अघि छ । एमालेले २ लाख ४७ हजार ७ सय १ मत पाउँदा कांग्रेसले २ लाख ४२ हजार ७ सय १३ मत पाएको छ । माओवादीले ९५ हजार १ सय ५० मत पाएको छ । प्रदेश ५ मा एमालेले ३ लाख १७ हजार २ सय ४२ र कांग्रेसले ३ लाख ७ हजार ६१ मत पाएको छ ।

प्रदेश ६ मा एमाले अघि छ भने प्रदेश ७ मा कांग्रेस पहिलो स्थानमा छ । एमालेले प्रदेश ६ मा १ लाख २ सय ४६ मत पाएको छ भने कांग्रेसले ९५ हजार ३१ मत ल्याएको छ । उक्त प्रदेशमा माओवादीले ७८ हजार ७ सय ५७ मत पाएको छ । प्रदेश ७ मा पहिलो स्थानमा रहेको कांग्रेसले १ लाख २६ हजार ३ सय १२ मत पाएको छ भने एमालेले १ लाख १६ हजार ९ सय ४० मत पाएको छ । यो प्रदेशमा माओवादीले ५० हजार ४ सय ७५ मत मात्र पाएको छ ।

प्रत्यक्षतर्फ

१ सय ६५ सदस्यीय प्रतिनिधिसभाको प्रत्यक्षतर्फ २ स्थानको मात्र मत परिणाम सार्वजनिक हुन बाँकी छ । सुनसरी ३ र कैलाली २ को मात्र नतिजा सार्वजनिक हुन बाँकी रहेको आयोगले जनाएको छ । यी दुवै स्थानमा एमालेले अग्रता लिइरहेको छ । हालसम्म एमालेले ७८ स्थानमा जित हासिल गरेको छ भने माओवादीले ३६ स्थान जितेको छ । कांग्रेसले २२ सिट जितेको छ भने राजपा ११, संघीय फोरम १०, नयाँ शक्ति १, जनमोर्चा १, नेमकिपा १ र १ जना स्वतन्त्रले जित हासिल गरेका छन् ।