उपप्रधान र वरिष्ठ मन्त्रीहरू नै पराजित

काठमाडौं : सत्तामा नै रहेर प्रतिस्पर्धा गर्दा पनि प्रधानमन्त्री शेरबहादुर देउवा सरकारका दुई उपप्रधानमन्त्री र केही वरिष्ठ मन्त्री निर्वाचनमा पराजित भएका छन् । वर्तमान सरकारका करिब १८ जना मन्त्री चुनावी मैदानमा थिए । तीमध्ये अधिकांश पराजित भएका छन् । निर्वाचनमा धेरै मन्त्रीको हारले सत्ता र शक्तिको आडमा निर्वाचन सजिलै जित्न सकिने सोचसमेत गलत सावित गरिदिएको राजनीतिक विश्लेषक बताउँछन् ।

सरकारका वरिष्ठ उपप्रधानमन्त्री कमल थापा निर्वाचनमा पराजित भएका छन् भने अर्का उपप्रधानमन्त्री गोपालमान श्रेष्ठ पनि पराजित भएका छन् । मकवानपुर १ बाट लोकतान्त्रिक गठबन्धनका साझा उम्मेदवार बनेका उपप्रधानमन्त्री थापा एमाले उम्मेदवार कृष्णप्रसाद दाहालसँग पराजित भए । अर्का उपप्रधानमन्त्री श्रेष्ठ स्याङ्जा २ मा एमालेकी पद्मादेवी अर्यालसँग पराजित भए ।

अर्का उपप्रधानमन्त्री विजयकुमार गच्छदारलाई सुनसरी ३ मा एमालेकी भगवती चौधरीले चुनौती दिइरहेकी छन् । सरकारका प्रवक्ता एवं सूचना तथा सञ्चारमन्त्री मोहनबहादुर बस्नेत सिन्धुपाल्चोक १ मा पराजित भए । उनी माओवादी केन्द्रका अग्नी सापकोटासँग ठूलो मतान्तरले पराजित भए । उद्योगमन्त्री सुनीलबहादुर थापा धनकुटामा एमालेका राजेन्द्र राईसँग पराजित भइसकेका छन् । महिला, बालबालिका तथा समाज कल्याण मन्त्री विक्रमबहादुर थापा पनि काठमाडौं ७ मा पराजित भएका छन् । थापा एमालेका रामवीर मानन्धरसँग फराकिलो मतान्तरले पराजित भए ।

यसैगरी कानुन, न्याय तथा संसदीय मामिला मन्त्री यज्ञबहादुर थापा कास्की १ मा एमालेका खगराज अधिकारीसँग पराजित भए । सहकारी तथा गरिबी निवारण मन्त्री अम्बिका बस्नेत पनि काठमाडौं ३ मा एमालेका कृष्ण राईसँग पराजित भइन् । श्रम तथा रोजगार मन्त्री फरमुल्लाह मन्सुर बारा ३ मा तेस्रो स्थानमा रहेर पराजित भइसकेका छन्् । भूमिसुधार तथा व्यवस्था मन्त्री गोपाल दहित पनि पराजित भएका छन् । उनी बर्दिया २ मा माओवादी केन्द्रका सन्तकुमार थारुसँग पराजित भए ।

भौतिक पूर्वाधार तथा यातायात मन्त्री वीरबहादुर बलायर डोटीमा एमालेका प्रेमबहादुर आलेसँग पराजित भए । वन तथा भूसंरक्षण मन्त्री विक्रम पाण्डे चितवन ३ मा माओवादी केन्द्रका अध्यक्ष पुष्पकमल दाहालस“ग पराजित भए । अधिकांश मन्त्रीले आफ्ना मन्त्रालय र मन्त्रालय मातहतका विभिन्न परियोजना र आयोजनाका चार÷पाँच वटा सवारीसाधन गाडी निर्वाचन प्रचारप्रसारमा कार्यकर्ता बोक्न दुरुपयोग गरेको सम्बद्ध मन्त्रालय स्रोतले बताएका छन् ।

तर अर्थमन्त्री ज्ञानेन्द्रबहादुर कार्की, रक्षामन्त्री भीमसेनदास प्रधान, सिँचाइमन्त्री सञ्जयकुमार गौतम र युवा तथा खेलकुदमन्त्री राजेन्द्रकुमार केसी भने निर्वाचनमा विजयी हुने भाग्यमानी मन्त्री भएका छन् ।