समानुपातिकमा ३८ दलले सय मत पनि कटाएनन्

धादिङ : प्रदेशसभा र प्रतिनिधिसभा निर्वाचन अन्तरगत समानुपातिकतर्फ भएको मतगणनामा धादिङमा ३८ वटा पार्टीले १ सय मत पनि कटाउन सकेनन । प्रतिनिधिसभातर्फ प्रतिस्पर्धामा रहेका ४९ पार्टीमध्ये ११ वटा पार्टीले मात्रै सयको आँकडा पार गर्न सके । सय नकटाउने ३८ वटा पार्टीमध्ये १६ पार्टीले दोहोरो अंकमा समेत मत ल्याउन सकेनन । २ वटा निर्वाचन क्षेत्र रहेको धादिङमा सबैभन्दा थोरै मत पाउँनेमा नेपाल युवा पार्टी रहेको छ । उसले २ मत मात्रै पाएको छ ।

मतपरिणाम अनुसार वागठबन्धनको एक घटक नेकपा एमाले ५८ हजार ९ सय ५० मतसहित पहिलो भएको छ । दोस्रोमा रहेको नेपाली कांग्रेसले ४२ हजार ८ सय ६१ मत पाउँदा नेकपा माओवादी केन्द्रले २५ हजार ७ सय ७० मतसहित तेस्रो स्थानमा रहेको छ । त्यस्तै राष्ट्रिय प्रजातन्त्र पार्टीले पनि धादिङमा ९ हजार ५ सय २९ मत ल्याएको छ ।

त्यस्तै प्रदेशसभातर्फ पनि २० पार्टीले सयको आँकडा छुन सकेनन । त्यसमध्ये ४ वटा पार्टीले दोहोरो अंकमा मत ल्याउन सकेनन । ४ वटा प्रदेश रहेको धादिङमा प्रदेशसभातर्फ सबैभन्दा थोरै मत ल्याउने पार्टीमा नेकपा माक्सवादी पार्टी रहेको छ । चारवटा प्रदेशबाट उसले जम्मा ५ मत मात्रै पाएको छ ।
३१ वटा पार्टी प्रतिस्पर्धामा रहेकोमा प्रदेशसभातर्फ पनि नेकपा एमाले ५४ हजार ६ सय ७५ मतसहित पहिलो भएको छ । दोस्रो स्थानमा रहेको नेपाली काँङग्रेसले ४० हजार ३३ मत ल्याउँदा २७ हजार २ सय ७० मतसहित नेकपा माओवादी केन्द्र तेस्रो बनेको छ । धादिङको क्षेत्र नं २ को २ प्रदेशमा प्रत्यक्षतर्फ उम्मेद्वारी दिएको राप्रपाले प्रदेशसभा तर्फ पनि कुल ७ हजार ९ सय ६१ मत ल्याएको छ ।

मत बदर : साढे ९ प्रतिशत

समानुपातिकतर्फ प्रदेश तथा प्रतिनिधि सभाको मतगणनामा कुल साढे ९ प्रतिशत मत बदर भएको पाइएको छ । प्रत्यक्ष र्फको भन्दा यो ५ प्रतिशतले बढी हो । प्रत्यक्षतर्फको मतगणनामा साढे ४ प्रतिशत मात्रै मत बदर भएको थियो ।

समानुपातिकमा पनि प्रतिनिधिसभामा भन्दा प्रदेश सभामा दोब्बर बढी मत बदर भएको छ । कुल १ लाख ५५ हजार ३ सय २३ मत खसेको समानुपातिकमा प्रतिनिधिसभातर्फ ७ दशमलव ७७ प्रतिशत अर्थात १२ हजार ८३ मत बदर भएको थियो भने प्रदेशसभातर्फ ११ दशमलव १८ प्रतिशत अर्थात १७ हजार ३ सय ७४ मत बदर भएको थियो ।

२ वटा प्रतिनिधिसभा र ४ वटा प्रदेशसभाको क्षेत्र रहेको धादिङमा क्षेत्रगत तुलनामा क्षेत्र नं १ मा भन्दा क्षेत्र नं २ मा ४ सय ७२ मत बढी बदर भएको छ । क्षेत्र नं १ मा कुल खसेको ७८ हजार ७ सय ३२ मतमध्ये ५ हजार ८ सय ३ मत बदर भएको थियो भने क्षेत्र नं २ मा कुल खसेको ७६ हजार ५ सय ९१ मत मध्ये ६ हजार २ सय ८० मत बदर भएको थियो ।

त्यस्तै ४ वटा प्रदेशमध्ये क्षेत्र नं १ को १ प्रदेशमा सबैभन्दा धेरै ४ हजार ८ सय ३० मत बदर भएको छ । त्यहाँ कुल ४३ हजार ४ सय ४८ मत खसेको थियो । त्यस्तै १ को २ मा कुल खसेको मध्ये ३५ हजार २ सय ८४ मतमध्ये ३ हजार ७ सय ३२ मत बदर भएको थियो । त्यसैगगरी क्षेत्र नं २ को १ मा कुल खसेको ४१ हजार २ सय ५९ मतमध्ये ४ हजार ६ सय ३६ मत बदर भएको थियो भने क्षेत्र नं २ को २ मा कुल खसेको ३५ हजार ३ सय २२ मतमध्ये ४ हजार १ सय ७६ मत बदर भएको जिल्ला निर्वाचन कार्यलय धादिङले जानकारी दिएको छ ।