पर्वतमा २२ उम्मेदवारको जमानत जफत
कुश्मा : प्रतिनिधिसभा र प्रदेशसभा निर्वाचनमा उम्मेदवारी दिएका पर्वतका २२ जना उम्मेदवारको जमानत जफत भएको छ । कुल सदर मतको १० प्रतिशत मत कटाउन नसकेका कारण २२ जना उम्मेदवारको जमानत जफत भएको हो । पर्वतमा प्रतिनिधिसभामा दुई र प्रदेशसभा १ र २ मा पनि दुई÷दुईजना मात्र उम्मेदवारले जमानत बचाउन सके ।
बाँकी सबै उम्मेदवारको जमानत जफत भएको जिल्ला निर्वाचन कार्यालय पर्वतले जानकारी दिएको छ । कार्यालय प्रमुख लक्षु शर्माका अनुसार प्रतिनिधिसभामा पराजित अर्जुनप्रसाद जोशी तथा प्रदेसभामा पराजित नवराज गुरुङ र राजेन्द्र तिवारीको मात्रै जमानत बचेको छ । पर्वतको प्रतिनिधिसभामा १४ जना उम्मेदवार चुनावी मैदानमा थिए । प्रदेशसभा १ मा ६ र प्रदेशसभा २ मा आठजना उमेदवारले प्रतिस्पर्धा गरेका थिए ।
कार्यालयका अनुसार पर्वतमा प्रतिनिधिसभा र प्रदेशसभातर्फ ६९ हजार आठ सय ६३ मत खसेको थियो । त्यसमध्ये प्रतिनिधिसभामा ६७ हजार पाँच सय ८२ मत सदर भएको थियो । दुई हजार दुई सय ८१ मत भने बदर भएको थियो ।
जमानत जफत भएकामध्ये प्रतिनिधिसभा नेकपा मालेका हरिहर थापाले पाँच सय ९९, राष्ट्रिय जनमुक्ति पार्टीकी मानकुमारी पाईजाले दुई सय ५५ तथा राष्ट्रिय जनमोर्चाका गोविन्द पौडेलले २ सय ३४ मत पाएका थिए । प्रदेशसभा १ तर्फ ३८ हजार सात सय २७ मत सदर भएको थियो भने २९ हजार पाँच सय ८४ मत सदर भएको थियो । प्रदेशसभा १ मा चार र प्रदेशससभा २ मा ६ उम्मेदवारको जमानत जफत भएको छ ।
प्रतिक्रिया दिनुहोस !
