मतदातालाई धन्यवाद दिन घरदैलोमा

गुल्मी : प्रतिनिधि र प्रदेशसभा सदस्य निर्वाचनमा गुल्मीका सबै क्षेत्रमा वाम गठबन्धनका उम्मेदवार विजयी भएका छन् । जिल्लामा प्रतिनिधिसभाका लागि दुई निर्वाचन क्षेत्र र प्रदेशसभाका लागि चार निर्वाचन क्षेत्र रहेकोमा प्रतिनिधि र प्रदेशसभा सबैमा वाम गठबन्धनका उम्मेदवार विजयी भएका हुन् ।

निर्वाचन क्षेत्र नं १ बाट एमाले सचिव प्रदीप ज्ञवालीले विजय हासिल गरेका छन् । कांग्रेसका युवा नेता चन्द्र भण्डारीलाई पराजित गर्दे ३७ हजार ८ सय १४ मत प्राप्त गरी ज्ञवाली विजयी भएका हुन् । भण्डारीले ३० हजार दुई सय ५६ मत ल्याएका छन् । यसअघिका २०६४ को संविधानसभा सदस्यको निर्वाचनमा ज्ञवाली र २०७० को निर्वाचनमा भण्डारी विजयी भएका थिए ।

निर्वाचन क्षेत्र नं २ मा पनि एमाले सचिव गोकर्ण विष्टले भारी मतअन्तरका साथ विजय प्राप्त गरेका छन् । झन्डै दोब्बर मतान्तरले विजयी विष्टले ३४ हजार ६ सय १८ मत प्राप्त गरेका छन् । कांग्रेसका चन्द्र केसीले भने २० हजार एक सय ५७ मत प्राप्त गरेका छन् ।

विजयी उम्मेदवारहरू कृतज्ञताका लागि पुनः गाउँ पुगेका छन् ।

मतदाताले आफुहरूलाई विश्वास गरी मत दिएकाले विजयी उम्मेदवारहरू मतदातालाई धन्यवाद दिन पुनः गाउँ पुगेका छन् । विजयी भइसकेपछि सबैभन्दा पहिलो प्राथमिकतामा मतदाता रहेको बताउँदै उनीहरू गाउँ पुगेका हुन् । जनताको मत सर्वोपरि भएकाले मतदाताकै घरमा पुगेको एमाले सचिव तथा क्षेत्र नं १ का निर्वाचित सांसद प्रदीप ज्ञवालीले बताए । ‘म फेरि पनि जनताकै घरदैलोमा छु', उनले भने, ‘विकास र समृद्धिका कामको भारी बोकेर फर्किन्छु ।' मतदातालाई धन्यवाद दिँदै उनले आफू सोही क्षेत्रको विकासमा निरन्तर लाग्ने प्रतिक्रिया दिए । एमाले सचिव तथा क्षेत्र नं २ का सांसद गोकर्ण विष्ट पनि मतदातालाई धन्यवाद दिन घरमै पुगेका छन् ।

विजय भईसकेपछि एमाले सचिवद्धय प्रदिप ज्ञवाली र गोकर्ण विष्ट सहित बाम गठबन्धनका उम्मेदवार ।