जनकपुरधाम : प्रतिनिधिसभा तथा प्रदेशसभा निर्वाचनमा धनुषाबाट उम्मेदवारी दिएका एक सय ८४ जनाको जमानत जफत भएको छ । एक बिनाविभागीय राज्यमन्त्रीसमेत यहाँ जमानत जोगाउन असफल भएका छन् । प्रतिनिधिसभातर्फ ७२ र प्रदेशसभातर्फ एक सय १२ जनाको जमानत जफत भएको हो ।
प्रतिनिधिसभा अन्तर्गत चार निर्वाचन क्षेत्रमध्ये १ मा १५, २ मा १२, ३ मा २६ र ४ मा २२ जनाको जमानत जफत भएको छ । प्रदेशसभातर्फ क्षेत्र नम्बर १ क मा मा १३, ख मा १३, २ को क मा ११, ख मा १८, ३ को क मा १२ र ख मा १८ जनाको जमानत जफत भएको जनाइएको छ । त्यसैगरी, क्षेत्र नम्बर ४ को प्रदेशसभा क मा १५ र ख मा १२ जनाको जमानत जफत भएको निर्वाचन कार्यालयको तथ्यांकमा उल्लेख छ ।
यसरी जमानत जफत हुनेमा राज्यमन्त्रीदेखि स्वतन्त्र उम्मेदवारसम्म छन् । बिनाविभागीय राज्यमन्त्री रामसिंह यादवको पनि जमानत जफत भएको हो । देशभर वाम गठबन्धनको लहर भए पनि धनुषा क्षेत्र नम्बर ३ बाट प्रतिनिधिसभा सदस्यमा यादवले निकै कम मत ल्याउन सके । उनले दुई हजार तीन सय ९२ मत मात्र पाएका हुन् । ९७ हजार पाँच सय मतदाता रहेको यो क्षेमा ६५ हजार दुई सय ६९ मत खसेको थियो । यस क्षेत्रबाट राजपाका उम्मेदवार राजेन्द्र महतो कांग्रेसका विमलेन्द्र निधिलाई दुई हजार नौ सय तीन मतले पराजित गर्दै निर्वाचित भएका छन् ।
यस क्षेत्रकै चर्चित व्यक्तित्व डा. कृष्णचन्द्र साहले पनि जमानत गुमाएका छन् । क्षेत्र नम्बर ४ बाट प्रतिनिधिसभा सदस्यमा स्वतन्त्र उम्मेदवारी दिएका साहलाई ९८ मत प्राप्त भएको थियो ।
प्रतिक्रिया दिनुहोस !
