रोल्पामा २२ प्रतिशतभन्दा बढी मत बदर
रोल्पा : एउटै जिल्लामा हजारौंको संख्यामा मत बदर भएपछि रोल्पामा निर्वाचन आयोग र दलहरू आश्चर्यमा परेका छन् । यसले समानुपातिक सूचीमा रहेका नेता चिन्तामा पारेको छ । प्रतिनिधिसभा र प्रदेशसभाको प्रत्यक्ष र समानुपातिकतर्पm गरी रोल्पामा ३७ हजारभन्दा बढी मत बदर भएको छ । प्रदेशसभाको समानुपातिकतर्पm मात्र २२.३४ प्रतिशत मत बदर भएको छ, जुन खसेको मतमध्ये १५ हजार ७ सय ६६ हो । कांग्रेस र एमालेले प्राप्त गरेको मतभन्दा बढी मत बदर भएको छ । कांग्रेसले १४ हजार ४ सय १८ र एमालेले १० हजार दुई सय ११ मत ल्याएका छन् ।
मतगणनाअनुसार प्रत्यक्षको तुलनामा समानुपातिकमा धेरै मत बदर भएको छ । ‘मतगणनाका बेला बदर मत भएको सुनाउँदा र देखाउँदा मन कटक्क दुख्यो’, मुख्य निर्वाचन अधिकृत वासुदेवलाल श्रेष्ठले भने, ‘लोकतान्त्रिक चुनावमा मतदाताको एक मतको पनि ठूलो अर्थ हुन्छ । यति धेरै संख्यामा मत बदर हुनु चिन्ताको विषय हो ।’
प्रतिनिधि र प्रदेशसभाका लागि समानुपातिकमा खसेको मत ७० हजार पाँच सय ७० मा प्रदेशसभातर्फ ५४ हजार आठ सय चार मत मात्र सदर र प्रतिनिधिसभातर्पm ५९ हजार ७६ मत सदर भयो । प्रतिनिधिसभामामा बदर मत ११ हजार चार सय ९४ हो, जुन १६ दशमलव २९ प्रतिशत हो । समानुपातिकमा प्रतिनिधिसभातर्पmको तुलनामा प्रदेशसभामा चार हजार दुई सय ७२ बढी मत बदर भएको छ । धेरैजसो मतपत्रमा प्रतिनिधिसभाको चिह्न रहेको माथिल्लो भागमा मतदान गरेपछि तलतिर रहेको प्रदेशसभाको चिह्नमा मतदान नगरेको पाइएको छ ।
बदर भएको मत संख्या सुनाउँदा मन कटक्क दुख्यो । लोकतान्त्रिक चुनावमा मतदाताको एक मतको पनि ठूलो अर्थ हुन्छ ।
वासुदेवलाल श्रेष्ठ, मुख्य निर्वाचन अधिकृत
प्रतिनिधिसभामा कांग्रेसले १५ हजार आठ सय ४७ र एमालेले १० हजार पाँच सय ४५ मत पाएका छन् । माओवादी केन्द्रले २७ हजार दुई सय २० मत ल्याएको छ । प्रत्यक्षतर्पmका धेरैजसो मतपत्रमा एकभन्दा बढी चिह्नमा मत संकेत गरेको पाइएको मतगणनामा संलग्न कर्मचारीको भनाइ छ । माथिल्लो लाइनमा रहेको चिह्नमा लगातार छाप लगाउँदा मत बदर भएका छन् । कतिपयले मतपत्रमा ल्याप्चेसमेत लगाएको पाइएको छ । पत्याउँदा मसी लटपटिएका पनि छन् । चिह्न रहेको कोठाबाहिर मत संकेत गरिएको पनि भेटिएको छ ।
समानुपातिकतर्पm भने प्रतिनिधिसभाको चिह्न रहेको माथिल्लो भागमा मत संकेत गरेको तर तल्लो खण्डमा रहेको प्रदेशसभाको चिह्नमा नगरेको पाइएको छ । त्यसले पनि समानुपातिकमा धेरै मत बदर देखिएको हो । समानुपातिकतर्पmको मतपत्रमा माओवादी केन्द्र र एमालेका दुवै चिह्नमा मत संकेत गरेर पनि धेरै मत बदर भएको पाइएको छ ।
यसकारण बढ्यो बदर संख्या
जिल्ला निर्वाचन कार्यालयबाट मतदाता शिक्षा पर्याप्त मात्रामा हुन नसक्नु र दलहरूले पनि मतदातालाई मतदान गर्न सिकाउन नसकेकाले धेरै मत बदर भएको दाबी गरिएको छ । निर्वाचन कार्यालयले कात्तिक २५ गते मात्र मतदाता शिक्षा स्वयंसेवकलाई तालिम दिएर गाउँमा खटाएको थियो । ती स्वयंसेवकले घरघरमा पुगेर मतदाता शिक्षा दिन सकेनन् । मतदाता शिक्षा प्रभावहीन बनेका काररण बदर मतको संख्या बढेको सरोकारवालाको भनाइ छ । धेरै चिह्नमा मत संकेत हुनु, ल्याप्चे लगाएको पाइनु र समानुपातिको माथिल्लो खण्डको चिह्नमा मात्र संकेत गर्नुले मतदाता शिक्षा प्रभावहीन भएको मान्न सकिने उनीहरूले बताए ।
प्रतिक्रिया दिनुहोस !
