मिचेल ओबामा भन्छिन्, ‘ट्विट गर्नुअघि सोच्नुस्’
सामाजिक सञ्जालमा हतारमा लेख्ने र पछि ‘डिलिट’ गर्नेहरूको कमी छैन । कहिलेकाहीँ फेसबुक, ट्विटरमा अनावश्यक कुरा लेखेकैले झमेलामा फस्नेहरू धेरै छन् । अमेरिकाकै राष्ट्रपति डोनाल्ड ट्रम्पले २७ सेप्टेम्बरमा रोय मुरे र लुथर स्ट्रेन्जबारे गरेको एउटा ट्विट निकै विदास्पद भयो । अन्तत: उनले ट्विट नै ‘डिलिट’ गरे । ‘टाइम्स’ म्यागजिनका लागि एलाना अब्रामसनले भनेकी छिन्, ‘ट्रम्पले ट्विट डिलेट गरेको यो पहिलो घटना होइन ।
यसभन्दा अघि पनि धेरैपटक उनले यस्तो काम गरेका छन् ।’ ट्रम्प प्रतिनिधि पात्रमात्र हुन् । सामाजिक सञ्जालमा अनावश्यक र जथाभावी लेखेर आलोचना खेप्नेहरू धेरै छन् । त्यसैले, सोचेर मात्र ‘स्ट्याटस’ पोस्ट् गर्न सल्लाह दिन्छिन्, मिचेल ।
ओबामा फाउन्डेसनद्वारा अक्टोबर ३१ र नोभेम्बर १ मा चलेको ‘युथ लिडरसिप समिट’को उद्घाटन समारोहमा बोल्दै मिचेलले भनिन्, ‘शब्दहरूले अर्थ राख्छन् । बोल्दा ध्यान दिनुहोस् ।’ हरेक स्ट्याटस, ट्विट धेरै मान्छेसम्म पुग्ने भएकाले केही क्षण सोचेर मात्रै पोस्ट् गर्न उनको सल्लाह छ । सामाजिक सञ्जालमा व्यक्त गरिएका विचार आफ्नै इतिहास हुन्, त्यसैले अर्थपूर्ण कुरालाई मात्रै स्थान दिन जरुरी छ । ट्विटरलाई दिमागमा आएका हरेक विचारहरूलाई पोस्ट् गर्ने साधनको रूपमा मात्र नलिन मिचेल आग्रह गर्छिन् उनी ।
युवा नेतृत्व शिखर सम्मेलनको उद्देश्य नै नयाँ पुस्तासँग संवाद गर्ने भन्ने थियो । अर्थात्, पुरानो पुस्ता र नयाँ पुस्ताको दूरी हटाउनु । कार्यक्रममा ६० देशका लगभग पाँच सय युवाको सहभागिता थियो । कार्यक्रममा राजकुमार ह्यारी पनि उपस्थित थिए । कार्यक्रम अवधिभर युवासँग सम्बन्धित विभिन्न विषयमा छलफल चल्यो । सामाजिक सञ्जालका विषयमा मिचेलले केही समय बोलेकी थिइन् ।
‘तपाईंसँग शब्द छन् भन्दैमा यसलाई जसरी पनि प्रयोग गर्न सकिन्छ भन्ने होइन,’ ओबामाले कवि एलिजाबेथ अलेक्जेन्डरसँगको कुराकानीमा भनिन्, ‘दिमागमा जे कुरा आयो त्यो भनिनहाल्नुस् । प्रत्येक सोचाइलाई ट्विटमा बदल्नुपर्छ भन्ने छैन । तपाईंले अहिले सोचेका कुरा एकैछिनपछि काम नलाग्ने पनि हुन सक्छ ।’
कार्यक्रममा अलेक्जेन्डरको पहिलो प्रश्न थियो, ‘शब्दबाटै हामी को हौं भन्ने कुरा पनि पत्ता लाग्छ । जब तपाईं सार्वजानिक रूपमा आफ्नो विचार राख्नुहुन्छ भने त्यो निकै प्रयोगकारी बन्न सक्छ । शब्दको महत्व बताइदिनुस् ? ’
जवाफमा मिचेलले आफू हरेक शब्दहरूको प्रभाव विचार गरेरमात्रै बोल्ने बताएकी थिइन् । अहिलेको दुनियाँमा सामाजिक सञ्जाल एकदमै ‘शक्तिशाली हतियार’ बन्ने सक्ने कुरामा उनको जोड थियो । सामाजिक सञ्जालबारे खरो टिप्पणी गरिरहँदा दर्शकले निरन्तर ताली बजाइरहेका थिए । हाँसो पनि चलिरहेको थियो । सामाजिक सञ्जालमा कसरी प्रस्तुत हुने भन्ने जानकारीसँगै उनले यो पनि भनिन्, ‘मैले कसैलाई पनि व्यक्तिगत रूपमा भनिरहेको छैन । हामी सबै सामाजिक सञ्जाल प्रयोगकर्ताले बुझ्नुपर्छ ।’
नेतृत्वदायी भूमिकामा पुगिसकेपछि शब्दहरूले झनै महत्वपूर्ण अर्थ राख्ने उनको अनुभव छ । नेतृत्वसँग जनताको अपेक्षा हुन्छ । उनीहरूले नै जथाभावी बोल्न÷लेख्न थाले भने गलत सन्देश जाने मिचेलले बताइन् ।
(‘टाइम’ म्यागेजिनबाट)
प्रतिक्रिया दिनुहोस !
