मतदाता शिक्षा प्रभावहीन

प्युठान : स्थानीय तहको तुलनामा प्रतिनिधि तथा प्रदेशसभा चुनावमा बदर मतको संख्या बढेको छ । स्थानीयमा जिल्लाभर २ प्रतिशत मत बदर भएकोमा यसपटक करिब ८ प्रतिशत बदर भएको छ । प्रतिनिधि तथा प्रदेशसभा निर्वाचनमा खसेको कुल मतमध्ये समानुपातिकतर्फ १० हजार तीन सय ३५ मत बदर भएको मुख्य निर्वाचन अधिकृतको कार्यालय प्युठानले जनाएको छ ।

प्रत्यक्षतर्फ ६ हजार तीन सय ३५ मत बदर भएको छ । ‘धेरैजसो एउटै मतपत्रमा क्रमशः धेरै पार्टीलाई भोट हालेको भेटियो', मुख्य निर्वाचन अधिकृत हेमबहादुर सेनले भने, ‘स्थानीयमा पनि यस्तै पाइएको थियो ।' कतिपय मतदाताले औठाछाप समेत हानेको भेटिएको उनले जानकारी दिए ।

बदर मतको संख्याले समेत निर्वाचनका लागि जिल्लामा लाखौं रुपैयाँ खर्चेर गरिएको मतदाता शिक्षा कार्यक्रम प्रभावहिन देखिएको छ । जिल्ला निर्वाचन कार्यालयले जिल्लाभर २ सय स्वयंसेविका परिचालन गरी मतदाता शिक्षा कार्यक्रम सञ्चालन गरेको थियो ।

गाउँ तहसम्म कार्यक्रम प्रभावकारी रुपमा सञ्चालन हुन नसक्दा बदरमतको संख्या बढेको सर्वसाधारणको भनाइ छ ।

जिल्ला निर्वाचन अधिकारी कृष्णबहादुर कुवँरका अनुसार मतदाता शिक्षा कार्यक्रमका लागि जिल्लामा कुल ३६ लाख रुपैयाँ बजेट खर्च गरिएको छ । मतदाता शिक्षाका लागि ३० लाख र तालिम सञ्चालन वापत् ६ लाख रुपैयाँ खर्च भएको उनको भनाइ छ । ‘समय छोटो हुँदा पनि कार्यक्रम प्रभावकारी ढंगले सञ्चालन गर्न सकिएन', उनले भने, ‘स्थानीयको तुलनामा यसपटकको मतपत्र समेत अप्ठ्यारो थियो । दलहरूले समेत मतदाता शिक्षा सँगसँगै लगेको भए बदर कम हुने थियो ।'

निर्वाचन कार्यालयले मतदाता शिक्षाका लागि वितरण गर्ने प्रचार सामग्रीहरू राम्रोसँग मतदाता सामु नपुर्‍याएको मतदाताको गुनासो छ । जिल्लाभर एक लाख ३८ हजार ६ सय ४१ मतदातामध्ये ९० हजार चार सय १३ जनाले मतदान गरेका थिए । बाम गठवन्धनका उम्मेदवार धेरै मत बदर भएको छ ।

शुक्रबार घोषणा गरिएको अन्तिम मतपरिणाम अनुसार जिल्लामा एमाले पहिलो पार्टी बनेको छ । २४ हजार सात सय ६३ मत लिएर यसपाली पनि एमाले पहिलो पार्टी बनेको हो । कांग्रेससँगको मतान्तर एमालेको एक हजार नौ सय १७ मात्र छ । कांग्रेसले २२ हजार आठ सय ४६ मत पाएको मुख्य निर्वाचन अधिकृत सेनले जानकारी दिए ।

स्थानीय तह निर्वाचनमा पनि एमाले जिल्लाको पहिलो पार्टी बनेको थियो । तेस्रो बनेको राष्ट्रिय जनमोर्चाले १५ हजार चार सय ७४ र चौथो दल माओवादी केन्द्रले १४ हजार ८२ मत पाएको छ । सबै दलले स्थानीय तहकै हैसियतमा आफ्नो अस्तित्व कायम गरेका छन् ।

प्रतिनिधि तथा प्रदेशसभा निर्वाचनका लागि भएको निर्वाचनमा प्रत्यक्षतर्फ जिल्लामा सबै क्षेत्रमा बाम गठवन्धनका साझा उम्मेदवार विजयी भएका छन् । प्रतिनिधिसभा सदस्यमा राजमोका केन्द्रीय उपाध्यक्ष दुर्गा पौडेल, प्रतिनिधिसभा सदस्यतर्फ (क) मा एमालेका हरी रिजाल र (ख)मा माओवादी केन्द्रका कृष्णध्वज खड्का विजयी भएका छन् ।

जिल्लामा तीन ठूला वाम दल एमाले, राजमो र माओवादी केन्द्रले चुनावी तालमेल गरी अघि बढेका थिए । कांग्रेसँग राप्रपा मिसिएको थियो । विगतका निर्वाचनमा बोलियो देखिएको राजमो यसपाली तेसो शक्तिका रुपमा झरेको छ । रविन्द्र मिश्र नेतृत्वको विवेकशील साझा पार्टीले प्युठानबाट ५ सय ६४ मत ल्याएको छ ।