दुई सयको जमानत जफत
गौर : रौतहतका चार निर्वाचन क्षेत्रमा प्रतिनिधि र प्रदेशसभा चुनावमा उम्मेदवार बनेका दुई सय जनाको जमानत जफत भएको छ। रौतहट १ बाट प्रतिनिधिसभा सदस्यमा उम्मेदवार बनेका नेपाली जनता दलका केन्द्रीय अध्यक्ष हरिचरण साहको जमानत जफत भएको छ।
२०७० को दोस्रो संविधानसभा निर्वाचनमा समानुपातिक निर्वाचन प्रणालीबाट सभासद बनेका साहले ३ सय ३८ मत मात्रै पाएका छन्। पूर्वसभासद बबन सिंहको पनि जमानत जफत भएको छ। सिंहले २०६४ को संविधानसभा चुनावमा स्वतन्त्र उम्मेदवारी दिएर जितेका थिए। यो निर्वाचनमा १ नं क्षेत्रबाट उम्मेदवार बनेका सिंहले एक हजार ६ सय ६९ मत मात्रै पाए।
रौतहटका एकसय ९८ जना उम्मेदवारको जमानत जफत भएको जिल्ला निर्वाचन कार्यालय रौतहटले जनाएको छ। दशप्रतिशत भन्दा कम मत ल्याएका उम्मेदवारको जमानत जफत भएको हो।
रौतहटको चारवटा प्रतिनिधि सभा र ८ प्रदेशसभा निर्वाचन क्षेत्रमा दुई सय ३५ जनाको उम्मेदवारी परेको थियो। एक सय ४४ जना प्रदेशमा र ९१ जनाले प्रतिनिधि सभा सदस्यका लागि उम्मेदवारी दिएका थिए। प्रतिनिधि सभाका चारवटै निर्वाचन क्षेत्रका ८० जना उम्मेदवारको जमानत जफत भएको छ।
प्रतिक्रिया दिनुहोस !
